Qazaqstannyń jas tennısshileri Devıs Kýbogynyń úzdik tórttigine endi
QARAǴANDY. QazAqparat – Úlken tennıs tarıhynda alǵash ret Qazaqstannyń jasóspirimder quramasy Devıs Kýbogynyń úzdik tórttigine kirdi. Qurama sapynda qaraǵandylyq Ámir Omarhanov pen Vıtalıı Zatsepın osyndaı joǵary nátıjege qol jetkizýge úles qosty, dep habarlaıdy QazAqparat tilshisi.
«Bul - joǵarǵy deńgeı! Balalar tyrysty, keremet oıyn kórsetti!» – deıdi Qazaqstan Tennıs Federatsııasy Qaraǵandy fılıalynyń keńesshisi Dıas Dosqaraev.
Esterińizge sala keteıik, Juniors Davis Cup týrnıri bıyl Nıý-Delıde ótti. Jasóspirimder – Ámir Omarhanov (Qaraǵandy), Vıtalıı Zatsepın (Qaraǵandy), Danır Qaldybekov (Almaty) jáne kapıtan Jansultan Shymbotaev (Nur-Sultan) – «S» tobynda Shrı-Lanka, Vetnam jáne Taıland komandalaryn jeńdi. 1/4 fınalda olar Ońtústik Koreıa ókilderimen jeńis úshin talasty.
Bastapqy oıynda Ámir Omarhanov qarsylastarynyń kóshbasshysyn 6:3, 6:4 esebimen senimdi jeńip, qazaqstandyq komandany alǵa shyǵardy. Ekinshi oıynda Danır Qaldybekov utyldy.
Sheshýshi juptyq oıynda Amır Omarhanov pen Vıtalıı Zatsepın jeńiske jetip, jartylaı fınalǵa joldama aldy. Sodan keıingi oıyn týrnır ıeleri – Úndistan quramasymen boldy, ony qazaqstandyqtar 0:2 esebimen jeńdi. Úshinshi oryn úshin ótken matchta qazaqstandyqtar Avstralııanyń eń myqty komandasyna jol berip qoıdy.
«Ámir Omarhanovty atap ótkim keledi. Ol keremet oıyn kórsetti. Barlyq kezdesýlerde jeńiske jetti. Biraq úndistandyq qarsylasyna sál kúshi jetpeı qaldy. Ámir barlyq qatysýshylardan jas ekenin umytpaıyq. Shyn máninde men óte qýanyshtymyn! Meniń oıymsha, budan da úlken nátıje bolady!» – deıdi Dıas Dosqaraev.
