Qazaqstannyń jas sportshylary ıAkýtskide ótip jatqan «Azııa balalary» V halyqaralyq sporttyq oıyndaryn sátti bastady, enshimizde «2 altyn»
ASTANA. 9 shilde. QazAqparat - 2012 jyldyń 5 shildesinde ıAkýtsk qalasynda (Saha Respýblıkasy, ıAkýtııa) «Azııa balalary» atty besinshi halyqaralyq sporttyq oıyndar bastaldy.
Onda Qazaqstannyń jas atletshileri óner kórsetpekshi. Bul týraly Qazaqstan Respýblıkasy Sport jáne dene shynyqtyrý isteri agenttiginiń baspasóz qyzmetinen habarlady.
27 elden kelgen 2 myń sportshy ıAkýtsk, Mırnyı jáne Nerıýngrı alańdarynda baq synaıdy. Qazaqstannan barǵan 80 jas sportshy jarys baǵdarlamasyndaǵy 20 oıyn túriniń 15-ine qatysady. Oıyn 15 shildege deıin jalǵasady.
«Azııa balalary» V halyqaralyq sporttyq oıyndar aıasynda ıAkýtsk qalasynda «Reseı - sporttyq memleket» atty ІV Halyqaralyq sporttyq forým ótip jatyr. Oǵan RF týrızm, jastar saıasaty jáne sport mınıstri Vıtalıı Mýtko, kúres federatsııasynyń prezıdenti Mıhaıl Mamıashvılı, olımpıada chempıony Svetlana Jýrova syndy jáne ózge de ataqty sportshylar qatysýda.
Jarys ótetin «Dohsýn» jabyq fýtbol alańy, «Trıýmf» sporttyq daıyndyq ortalyǵy, «Cholban» basseıni, «Modýn» sport keshenderi oıynnyń bastalýyna bir kún qalǵanda, saltanatty túrde ashylyp, paıdalanýǵa berildi.
Saha Respýblıkasynda 500-den asa qazaq dıasporasy turady. Olar qazaqstandyq sportshylardy ulttyq salt-dástúrimiz boıynsha qarsy aldy.
Saıystyń birinshi kúnin sambo kúresi bastady. Bul bastaý elimizden barǵan delegatsııa úshin tańǵalarlyq jańalyqqa toly boldy: 3 samboshynyń úsheýi de jarys fınalyna joldama aldy. Qýanysh ıeleri - 42 kg salmaqtaǵy Suńǵat Jubatqan, 48 kg salmaqtaǵy Parasat Jumabaı jáne 56 kg salmaq dárejesi boıynsha Serikbaı Nyǵmet.
Aqtyq saıysta alańǵa birinshi bolyp Suńǵat Jubatqan shyqty. Onyń qarsylasy Qorǵan qalasynyń (RF) ókili Savelıı Plehanov. Ol da osal emes. Áıtkenmen, jeńis otandasymyzǵa buıyrdy. Sál ǵana basymdylyqpen beldesýdi Suńǵat Jubatqan jeńdi. Ol Qazaqstan Respýblıkasynan barǵan «Azııa balalary» V HSO-nyń alǵashqy jeńimpazy boldy.
Kelesi bolyp saıys alańyna 48 kg salmaq dárejesindegi qazaqstandyq Parasat Jumabaı Altaı óńirinen kelgen Amyr Chadınmen kúsh synasty. Alaıda, sáttilik reseı sportshysynyń jaǵynda boldy. Úshinshi bolyp «Jeńiske 50 jyl» sport saraıynyń jarys alańyna salmaqtary 56 keliden aspaıtyn samboshylar shyqty. Osy oıynda jerlesimiz Serikbaı Nyǵmetke Reseı federatsııasynyń Sverdlov oblysynan kelgen Evgenıı Novoselovpen básekege túsý buıyrypty. Desek te, bizdiń Serikbaı aýyrtpa tásilmen esh qıyndyqsyz qarsylasyn jeńip, altyndy moınyna ildi. Jalpy oıynda sambo boıynsha 11 komanda baq synasty.
Sonymen, oıynnyń alǵashqy kúninde-aq bizdiń quramanyń enshisine 2 altyn, 1 kúmis medal buıyrdy. 2008 jyly ótken jarysta bizdiń qurama jalpykomandalyq ekinshi oryn alǵan bolatyn.
Tehnıkalyq qorytyndy jóninde myna saıttar boıynsha aqparat alýǵa bolady: www.gamesasia.ru jáne www.yakutsk2012.ru
