Qazaqstannyń jas palýandary Olımpıada oıyndarynyń lıtsenzııasyn ıelendi
ASTANA. QazAqparat - Qazaqstannyń jas palýandary jasóspirimder arasyndaǵy Olımpıada oıyndarynyń lıtsenzııasyn utyp aldy. Bul týraly Ulttyq komanda jáne sporttyq rezerv shtattyq dırektsııasynyń baspasóz qyzmetinen habarlady.
Olar 8-11 mamyr aralyǵynda Taıland astanasy Bangkokte ótken kadetter arasyndaǵy lıtsenzııalyq Azııa chempıonatyna qatysty.
Jasóspirimder arasynda Olımpıada oıyndaryn ótkizý týraly erejege sáıkes jarysqa erkin kúresten 46, 54, 63, 76, 100 keli, grek-rım kúresinen 42, 50, 58, 69, 85 keli, áıelder arasynda 46, 52, 60, 70 salmaq sanatynda 1-2 oryn alǵan sportshylar jiberiledi.
Sonymen, tamyz aıynda Qytaıdyń Nankın qalasynda ótetin baıraqty básekege Evgenıı Polıvadov (grek-rım kúresi, 69 keli), Raıymbek Qurmanáli (grek-rım kúresi, 58 keli), Muhambet Qýatbek (erkin kúres, 54 keli), Laýra Álmaǵanbetova (áıelder kúresi, 46 keli), Mereı Dúısenova (áıelder kúresi, 70 keli) qatyspaq.
Álemdik dodada el mereıin asyrǵan jas palýandar búgin Almatyǵa keledi.
