Qazaqstannyń jas ǵalymy Ulybrıtanııadaǵy halyqaralyq ǵalymdar saıysyna qatysty (FOTO)
ASTANA. QazAqparat - Qazaqstannyń ulttyq ınnovatsııalyq konkýrsynyń «Qazaqstannyń eń úzdik jas ǵalymy» atalymy boıynsha jeńimpazy Dana Aqylbekova Ulybrıtanııada 8-9 maýsym aralyǵynda ótken ǵylymı kommýnıkatsııa salasynyń halyqaralyq jarysyna alǵash ret Qazaqstan atynan qatysty.
Aıta keteıik, Qazaqstannyń jas ǵalymdary arasyndaǵy konkýrs 2015 jyly Investıtsııa jáne damý mınıstrligi men Tehnıkalyq damý jónindegi ulttyq agenttik tarapynan uıymdastyryldy. Al Qazaqstandaǵy British Council-men yntymaqtastyq memorandýmy arqasynda konkýrs jeńimpazy halyqaralyq FameLab baıqaýyna qatystyrý týraly ýaǵdalastyqqa qol jetken bolatyn.
«Qazaqstannyń eń úzdik jas ǵalymy» konkýrsyna elimizdiń barlyq derlik óńirinen 98 ǵalym atsalysǵan. Konkýrs nátıjesinde bas júlde ıegeri atanǵan Nazarbaev Ýnıversıtetiniń túlegi Dana Aqylbekovaǵa 7,5 mln. teńge tabys etilip, Qazaqstan atynan halyqaralyq jarysqa qatysý quqyǵy berildi. Dana Aqylbekova elimizde ótken konkýrsqa densaýlyq saqtaý salasyndaǵy óziniń ǵylymı zertteý jumysyn kórsetken bolatyn. Jas ǵalym ekinshi tıpti dıabetpen naýqastanatyn adamdarǵa ınsýlın egýdiń jańa tásilderin zertteýmen aınalysady. Dál osy jobasyn Dana Aqylbekova álemniń 26 elinen qatysýshylar baq synaǵan Ulybrıtanııadaǵy halyqaralyq konkýrsqa usyndy.
«Halyqaralyq FameLab konkýrsynyń chempıony tıtýly úshin saıys barysynda Dana Aqylbekova fınaldyq aldyn ala irikteýden súrinbeı ótti. Alaıda, fınaldyń qorytyndy bóligine shyǵa almady. Buǵan negizinen osyndaı dárejedegi konkýrstarǵa qatysý tájirıbesiniń jetkiliksizdigi sebep bolǵan bolýy kerek. Degenmen, ádilqazylar qazaqstandyq jas ǵalymnyń jobasyn laıyqty baǵalap, Qazaqstan ókiliniń bul konkýrsqa óziniń jeke zertteýin usynǵanyn erekshe baǵalaǵan. Óıtkeni, halyqaralyq jarysqa qatysýshylardyń basym bóligi basqa avtorlardyń ǵylymı jańalyqtary týraly áńgimeleý múmkindigine ıe bolǵan edi», - delingen baspasóz málimdemeside.
Aıta keterligi, qazaqstandyq jas ǵalymmen birge elimizdegi konkýrstyń 2 jáne 3 oryn ıegerleri de bardy. Olardyń Ulybrıtanııaǵa saparyn British Council ókildigi qoldaý kórsetti. Jas ǵalymdar halyqaralyq jarys aıasynda basqa elderden kelgen áriptesterimen kezdesip, ózara tájirıbe bólisýge múmkindik aldy, sonymen qatar, olar áıgili «Cheltenham Science Festival» halyqaralyq ǵylymı festıvaline qatysý múmkindigine ıelendi.
