Qazaqstannyń jas estrada juldyzdary Jastar jylyna qoldaý bildirdi
«2019 jyl Jastar jyly bolyp jarııalanyp, qatty qýanyp jatyrmyz. Bul jyl jastar úshin jemisti ári jeńisti jyl bolady dep senemin. Endi «Qazaqkontsert» birlestiginiń ótken jylǵy atqarǵan jumystaryna toqtalsam, úlkendi-kishili 139 jobany júzege asyrdyq. Onyń ishinde 2 halyqaralyq joba bar. Atap aıtqanda, ekinshi halyqaralyq «Astana» teatr festıvali ótti. Ekinshi jobamyz álemde áıgili Notre Dame de Paris mıýzıkli alǵash ret qazaq tilinde qoıyldy. Bul mıýzıkldi aldaǵy ýaqytta Azııa elderine shyǵarý josparda bar», - dedi shara barysynda «Qazaqkontsert» birlestiginiń estrada bóliminiń jetekshisi Móldir Áýelbekova.
Al ánshi Álisher Karımovte Jastar jyly jastarǵa úlken múmkinshilikter beretindigin basa aıtyp, byltyrǵy shyǵarmashylyq jetistikteri jaıynda sóz qozǵady. Bıyl óner jolynda júrgenine 15 jyl tolatyndyǵyn, aldaǵy ýaqytta elimizdiń túpikir-túpkirinde kontsert berý oıynda bar ekendigin atap ótti.
«Elbasymyzdyń bastamasymen 2019 jyldyń Jastar jyly dep jarııalanýy jastarǵa berilgen úlken qoldaý dep oılaımyz. «Jigitter» kvarteti sahnada júrgenine 15 jyl tolýyna oraı esep berý kontsertin ótken jyly Almatydaǵy «Almaty Arena» stadıonynda ótkizdi. Jeltoqsan aıynda Astana qalasynda mereıtoıymyzdy atap óttik. Halyqtyń kóńilinen shyǵatyn kesh ótkizdik dep oılaımyz. Taıaý arada 15 jyldyq mereıtoıǵa arnalǵan baǵdarlamamyzben alys-jaqyn eldi elderde óner kórset josparymyzda bar», - dedi óz kezeginde «Jigitter» kvartetiniń ánshisi Eldos Qanaev.
Al «Astana Opera» teatrynyń solısi Baqtııar Adamjan bıylǵy jyl jastarǵa zor jaýapkershilik te júkteıtindigin basa aıtty. Memlekettik jastar saıasatynyń arqasynda jastardyń úlken jetistikterge jetip jatqanydyǵyna da nazar aýdartty.
«Máselen, ózim 2013 jyly Astanaǵa kelgennen beri ómiri kúrt ózgerdi. Bul jastarǵa berilgen múmkinshiliktiń, durys kózqarastyń arqasy dep oılaımyn», dedi jas ánshi.
Ánshi Álı Oqapov ta ótken jylǵy shyǵarmashylyq jetistikterine toqtaldy.
«Ótken jyly bir armanym oryndalyp, jeke keshim ótti. Elimizdegi eń úzdik kontsert zalynda, úzdik mamandardyń qoldaýymen keremet kesh ótti dep esepteımin. Bıylǵy jylǵy josparlarym da oryndalady dep senemin. Jastar jylyna oraı kontsert berýge daıynbyz», - dedi Álı Oqapov.
