Qazaqstannyń jas dıplomattary týraly kitap tanystyryldy
ASTANA. QazAqparat - Búgin elordada elimizdiń jas dıplomattary týraly «Qazaqstan dıplomatııasynyń jańa esimderi» atty kitaptyń tanystyrylymy ótti, dep habarlaıdy QazAqparat tilshisi.
Kitap tanystyrylymyna QR Syrtqy ister mınıstrliginiń orynbasary Roman Vasılenko, jas dıplomattar jáne QR Prezıdenti janyndaǵy Memlekettik basqarý akademııasy Dıplomatııa ınstıtýtynyń tyńdaýshylary qatysty.
«Osy bastamamyz arqyly «100 jańa esim» ulttyq jobasyna úlesimizdi qosý maqsatyn aldymyzǵa qoıǵan edik. Kitapta 26 jańa esim bar. Sebebi, ótken jyly Táýelsizdigimizdiń 26 jyldyǵyn atap óttik. Bizdiń jastarymyz Táýelsizdik dáýiriniń urpaǵy. Olar Syrtqy ister mınıstrligi júıesinde laıyqty eńbek etip júr. Bul kitapta olardyń tarıhy men qatar kózqarastary da jan-jaqty berilgen. Bul jumystar aldaǵy ýaqytta da óz jalǵasyn tabady jáne qoǵamymyzǵa qazaqstandyq dıplomatııanyń jańa esimderin tanystyrady», - dedi shara barysynda Roman Vasılenko.
Aıta keterligi, kitaptyń alǵy sózin elimizdiń burynǵy Syrtqy ister mınıstri Qaırat Ábdirahmanov jazǵan.
«Bul kitapta biz kópshiligi táýelsiz qazaqstanda týyp-ósken jas dıplomattar týraly áńgimeleımiz. Bular jańa tolqyn, jańa dáýirdiń - Táýelsizdik dáýiriniń azamattary. Olar jańasha oımen, Otanǵa jáne onyń múddelerine degen erekshe sezimmen, ushqary maqsattarǵa jáne pragmatızmge umtylýymen, bolashaqqa degen senimdi kózqarasymen jáne barlyq halyqaralyq áriptestermen teń dárejede dıalog qura bilýimen erekshelendi», - dep atap ótedi ol.
Jalpy bul joba 2018 jyldyń jazynda, Qazaqstan dıplomatııalyq qyzmetiniń 26 jyldyǵy qarsańynda uıymdastyryldy. Sol kezde Syrtqy ister mınıstrliginiń Feısbýktegi resmı paraqshasynda «Dıplomatııanyń 26 jańa esimi» jobasy bastalǵan edi.
