Qazaqstannyń jas boksshylary Azııa chempıonatynda birinshi oryn aldy
ASTANA. QazAqparat - Fılıppınde jasóspirimder arasyndaǵy bokstan Azııa chempıonaty ótti. Qazaqstan quramasy alty altyn medal jeńip aldy, dep habarlaıdy QazAqparat tilshisi Qazaqstannyń boks federatsııasyna silteme jasap.
Chempıonattyń fınalyna elimizdiń 8 birdeı boksshysy shyqty. Olardyń ishinde Mahmud Sabyrhan (48 kg), Beıbarys Jeksen (52 kg), Aıtjan Áshirhan (54 kg), Erasyl Jaqpekov (70 kg), Qýandyq Maqsut (75 kg) pen Saǵyndyq Toǵambaı (80 kg) altyn oljalady, al Aqylbek Muhtarov (46 kg) jáne Bekzat Erimbet (60 kg) kúmiske ıe boldy. Osylaısha, Qazaqstan quramasy alty altyn jáne eki kúmispen komandalyq esepte birinshi orynǵa ıe boldy.
Ekinshi orynda - Ózbekstan quramasy. Olar úsh altyn men úsh kúmis aldy. Úshinshi orynda - Japonııa boksshylary. Olar eki altyn jáne bir kúmis oljalady.
