Qazaqstannyń Japonııadaǵy elshiliginiń keńesshi-ýákili japon tiliniń sheshendik óner saıysynda qazylyq etedi

TOKIO. QazAqparat – Qazaqstannyń Japonııadaǵy elshiliginiń keńesshi-ýákili Batyrhan Qurmanseıit jyl saıyn Japonııanyń Syrtqy ister mınıstrligi men Ǵylym jáne bilim mınıstrliginiń bastamasymen ótetin Tokıoda akkredıttelgen sheteldik dıplomattar arasyndaǵy kezekti japon tiliniń sheshendik óner saıysy qazylar alqasynyń músheligine shaqyryldy. QazAqparat bul týraly QR elshiligine silteme jasap habarlaıdy.

2009 jáne 2011 jyldary atalǵan saıysta birinshi oryndy ıelengen alǵashqy qazaqstandyq dıplomat retinde sharanyń ashylý saltanatynda saıysqa qatysqan sheteldik dıplomattarǵa sáttilik tilegen B.Qurmanseıit óz sózinde Táýelsizdigimizdiń 30 jyldyǵyn jáne kelesi jyly Qazaqstan men Japonııa arasyndaǵy dıplomatııalyq qatynastardyń ornatylǵanyna 30 jyl tolatynyn atap ótti.

Sondaı-aq shara aıasynda QR Prezıdenti Qasym-Jomart Toqaevtyń tapsyrmasymen japon tiline aýdarylǵan «Abaı» kitaby tanystyrylyp, qatysýshylar men kórermenderge syıǵa tartyldy.
Atalǵan aıtýly saıystyń qazylar alqasyna qazaq dıplomatynyń shaqyrylýy uıymdastyrýshylardyń jalpy Qazaqstannyń Japonııadaǵy elshiligi men qyzmetkerleriniń biliktilik deńgeıin joǵary baǵalaıtynynyń aıqyn dáleli bolyp otyr.