Qazaqstannyń jáne Ózbekstannyń poshta qyzmetteri jetkiziletin taýarlar kólemin ulǵaıtady
NUR-SULTAN. QazAqparat – Qazaqstan men Ózbekstan arasyndaǵy halyqaralyq poshta jóneltilimderiniń kólemi artady. Bul týraly búgin Tashkent qalasyndaǵy kezdesý barysynda «Qazposhta» AQ Basqarmasynyń tóraǵasy Qanat Alpysbaev jáne «Ýzbekıston pochtası» AQ bas dırektory Alısher Faızýllaev ózara kelisti.
Qos memlekettiń ulttyq poshta qyzmetteri basshylary e-commerce salasyn damytý jolynda halyqaralyq poshta almasýdy kúsheıtýge baǵyttalǵan qujatqa qol qoıdy. Qol jetken kelisim qazaqstandyq kásipkerlerge ótkizý naryǵyn keńeıtýge jáne ózderiniń taýarlaryn Ózbekstanǵa jetkizýdi oń jolǵa qoıýǵa múmkindik beredi.
«Qazposhta» AQ Ózbekstannyń poshta qyzmetimen áriptestik aıasyn keńeıtip otyr. Bul naryqtyń barlyq qatysýshylaryna tıimdi: ózbekstandyq tutynýshylar bizdiń taýarlarǵa qol jetkizse, qazaqstandyq kompanııalar elektrondyq saýda arqasynda ótkizý naryǵyn keńeıtedi. «Qazposhta» AQ otandyq kásipkerlerge kórshiles memleketke taýardyń aýqymdy kólemin qysqa merzimde jetkizýge qoldaý kórsetedi. Osylaısha Qazposhta bıznes-qaýymdastyq úshin senimdi serikteske aınaldy jáne elektrondyq saýdany damytýǵa qolǵabys etýde » , - dep atap ótti «Qazposhta» AQ Basqarma tóraǵasy Qanat Alpysbaev.
Bıylǵy 1 mamyrdan bastap qos memlekettiń poshta qyzmetteri poshta almasý jıiligin aptasyna 5 retke deıin arttyrýdy josparlap otyr. Búginde poshta jóneltilimderi Qazaqstannan Ózbekstanǵa aptasyna 3 ret áýe kóligimen jáne 2 ret júr isti kóligimen jetkiziledi.
Ótken jyly Qazaqstannan Ózbekstanǵa 23 myńǵa jýyq sálemdeme, hat jáne EMS jóneltilimder jetkizilgen. Al kórshi memleketten elimizge jol tartqan poshta almasý kólemi 15 myńnan artqan. Sonymen birge bizdiń elimiz arqyly Qytaıdan Ózbekstanǵa 300 myń kg jýyq halyqaralyq poshta jóneltilimderi jetkizilgen.
