Qazaqstannyń jańa tarıhyn júıeli zertteý – memlekettik mańyzy bar is - Zarema Sháýkenova
«Bıyl – táýelsizdigimizdiń 30 jyldyǵy. Jahandy tarıh úshin qysqa merzim bolsa da, otyz jylda «Táýelsizdik urpaǵyn» ósirip úlgergen Qazaqstan úshin bul qýatty, ári kemel halyq bolý mindetin júkteıtin jańa beleske attanar mejeli kezeń.
Osyǵan oraı Egemen Qazaqstan gazetinde jaryq kórgen maqalasynda Prezıdent táýelsiz memlekettigimizdiń tuǵyry – jer, til, mádenıet pen tarıh, el birligi men qundylyq máseleleri tóńireginde oı qozǵady.
Jańa tarıhty zerdeleý erekshe memleket nazarynda bolmaq. Bul turǵyda «Mádenı mura» baǵdarlamasy aıasynda atqarylǵan qajyrly jumystyń nátıjesin qalyń jurtshylyqqa, ásirese jas býynǵa túsinikti túrde jetkizý halqymyzdyń tarıhı sanasyn jańǵyrtýǵa zor úlesin qosady. Jaqyn arada Qazaqstan telearnalarynan Altyn Orda tarıhy, Alash qaıratkerleriniń taǵylymy jóninde kórkem jáne derekti tarıhı týyndylar memleket qoldaýymen jaryq kóretin bolady», - dedi Zarema Sháýkenova.
Qazaqstan strategııalyq zertteýler ınstıtýty dırektorynyń aıtýynsha, maqalada tilge tıek bolǵa tarıhymyzdyń aqtańdaq betterin zertteý, ulttyq múdde turǵysynan olarǵa baǵa berý halyqtyń rýhanı jańǵyrýyna jańa serpin bermek.
«Alash qaıratkerleriniń murasyna, HH ǵasyrdyń basynda qazaq dalasyn sharpyǵan asharshylyqqa, 1986 jylǵy Jeltoqsan oqıǵasyna ǵylymı turǵyda baǵa berý, Qazaqstannyń jańa tarıhyn júıeli zertteý – bizge tarıh artyp otyrǵan amanat, keler urpaq aldyndaǵy paryz. Bul baǵyttaǵy jumys jas urpaqtyń sanasyn, ulttyń jadyn oıatyp, qazaqtyń san ǵasyrly tarıhyn barsha halyqaralyq qaýymdastyqqa pash etýge múmkindik beretin memlekettik mańyzy bar is», - dedi Zarema Sháýkenova.
Onyń aıtýynsha, Qazaqstannyń eko-júıesine janashyrlyq túptep kelgende naǵyz otanshyldyqtyń kórinisi.
«Altaıdan Atyraýǵa, Alataýdan Arqaǵa deıingi ata-babadan muraǵa qalǵan keń baıtaq qazaq jerin qasterleý, shynaıy otanshyldyq tanytyp keleshek urpaq úshin barynsha tabıǵı páktigin saqtaý – barlyǵymyzǵa ortaq mindet. Memleket tarapynan tıisti zańnama men is-qımyldar atqarylýda. Desek te, qoryqty jerlerge baı Qazaqstannyń eko-júıesin baptaý – barlyǵymyzǵa ortaq strategııalyq mańyzy bar mindet jáne túptep kelgende naǵyz otanshyldyqtyń kórinisi», - dedi Qazaqstan strategııalyq zertteýler ınstıtýtynyń dırektory.
Zarema Sháýkenova dáıekti túrde iske asyrylýdy talap etetin taǵy bir sharýa retinde Prezıdent qandastar kóshin jańǵyrtý qajetteligin atap ótkenine toqtaldy. Halyq tyǵyzdyǵy árkelki Qazaqstan aımaqtary úshin bul eńbek kúshin tıisti deńgeıde saqtap turýǵa, demografııalyq ahýaldy jaqsartýǵa múmkindik beretin erekshe mańyzy bar naýqan.
«Óz maqalasynda Prezıdent elimizdiń basty nyshandarynyń biri memlekettik til máselesine erekshe toqtaldy. Qazaq qalamgerleriniń úzdik shyǵarmalarynyń basylymy ulǵaıtylyp, balalar aýdıtorııasyna arnalǵan shetel avtorlarynyń tańdaýly týyndylary qazaq tiline aýdarylyp, osylaısha memlekttik til damýyna jańa serpin beriledi. Osy oraıda barsha qazaqstandyqtar da til ıgerý men onyń úıretýde yntasyn tanytý qajet.
Búgingi kúni qazaq tilin oqýǵa qulshynatyn árbir qazaqstandyqty qoldaý, ol úshin jaǵymdy jaǵdaı jasaý óte mańyzdy. Kez kelgen tildi úırenýde ortanyń mańyzy erekshe ekendigi bárimizge málim. Qazaq tilin endi ǵana meńgerip kele jatqan otandastarymyzǵa qateler jiberip alatyn jaǵdaıda túsinistikpen qarap, toleranttylyq tanytý, barynsha qazaq tilin oqýǵa talpyndyratyn atmosfera qurý – bul árbirimizdiń qolynan keletin jáne túptep kelgende qazaq tiliniń deńgeıin ultaralyq qoldanys dárejesine kóterýge jol ashatyn kishkentaı bolsa da, mańyzdy qadam», - dedi Zarema Sháýkenova.
Eske sala ketsek, búgin Qazaqstan Respýblıkasynyń Prezıdenti Qasym-Jomart Toqaev «Egemen Qazaqstan» gazetinde «Táýelsizdik bárinen qymbat» atty maqala jarııalady.
