Qazaqstannyń jańa Salyq kodeksi ıdeologııasymen erekshelenedi
ASTANA. QazAqparat - Qazaqstannyń jańa Salyq kodeksi ıdeologııasymen erekshelenedi. Bul týraly búgin QR Parlamenti Májilisindegi «Jańa salyq kodeksindegi salyq saıasaty» taqyrybyna arnalǵan dóńgelek ústel otyrysynda QR Ulttyq ekonomıka birinshi vıtse-mınıstri Rýslan Dálenov málim etti, dep habarlaıdy QazAqparat.
«Jańa Salyq kodeksi qoldanystaǵydan múldem basqa qurylymymen, jańa ıdeologııasymen erekshelenedi, al onyń mazmuny jeńil bolady. Onda kóleńkeli ekonomıka boıynsha sharalar kórinis tabady, birqatar jeńildikter júıelenedi, al jer qoınaýyn paıdalaný yntalandyrylady. Budan basqa, shaǵyn jáne orta bıznes jáne agroónerkisip kesheni sýbektileri úshin birqatar sharttar jeńildetiledi jáne qosymsha rejım usynylady. Ákimshilendirý qarapaıym bolady jáne yntalandyrýǵa tirek jasalynatyn bolady. Jańa Salyq kodeksiniń negizgi erekshelikteri osyndaı», - dedi ol.
Onyń aıtýynsha, ıdeologııa adal salyq tóleýshiniń múddelerin qorǵaýǵa baǵyttalatyn bolady.
«Birinshiden, barlyq túsiniksizdikter men dálsizdikter salyq tóleýshige túsindiriletin bolady. Atalǵan qaǵıda salyq daýlaryn ádil qaraýǵa múmkindik beredi. Búgingi kúngi júıe salyq zańnamasynda olqylyqtar bolǵan kezde salyq organdary salyq tóleýshiniń shyn máninde durys ustanymyn qabyldamaıtyndaı bolyp qurylǵan. Ekinshiden, eger salyq tóleýshi salyq organynyń túsindirmesine sáıkes áreket etken bolsa aıyppuldar men ósimpuldardy qoldanbaý usynylady. Úshinshiden, qaıta esepteýlerdiń negizdiligine talaptar kúsheıtiledi. Endi salyq tekseristeriniń aktilerinde tıisti negizdemeler bolýy tıis. Tórtinshiden, zańnamanyń ózgeristerin zerdeleý úshin bızneske kóbirek ýaqyt beriletin bolady. Túzetýlerdi 1 shildeden keshiktirmeı qabyldaý usynylady. Besinshiden, jyl ishindegi kóptegen túzetýlerden qorǵanys paıda bolady. Barlyq týyndaǵan túzetýlerdi biriktirip bir zań jobasymen engizý usynylyp otyr. Bul bızneske Salyq kodeksiniń barlyq ózgeristeri týraly habardar bolýǵa múmkindik beredi», - dedi Rýslan Dálenov.
