Qazaqstannyń jańa mamandyqtar atlasy kúzde daıyn bolady
«Orta mektepterde mamandyqqa baǵyt-baǵdarǵa qatysty ortaq kózqarastyń joq ekendigin moıyndaýymyz qajet. Qasym-Jomart Kemeluly, Sizdiń tapsyrmańyzben ázirlenip jatqan jańa mamandyqtar atlasy qyrkúıek aıynda tolyq daıyn bolady. Ony mektepterde mamandyqqa baǵdarlaýǵa alyp, keshendi júıege aınaldyrý qajet», - dedi Saıasat Nurbek.
Sonymen qatar ol kásiptik bilim beretin uıymdarǵa akademııalyq erkindik berý qajettigin basa aıtty.
«Qazirgi ýaqytta olar qandaı da bir ishki oqý josparyn 50 paıyzǵa deıin retteı alady. Biraq, olarǵa óńirlik erekshelikterdi, naqty kásiporyn qajettiligin eskere otyryp, tolyqqandy akademııalyq erkindik berý qajet. Kásiptik-tehnıkalyq bilim beretin uıymdar ózderiniń oqý baǵdarlamalaryn retteı alýlary qajet. Ekinshiden, kolledj stýdentteri bir mamandyq aıasynda birneshe biliktilik ala alýlary jáne eńbek naryǵyndaǵy ózgeriske ushyrap jatqan qajettilikterge barynsha tez beıimdelýi úshin mamandyqty lıtsenzııalaý kerek», - dedi BTSDigital bilim berý jobalarynyń jetekshisi.
Saıasat Nurbek kásiptik bilim berý áleýetin anyqtaýǵa múmkindik beretin WorldSkills baǵdarlamasyn engizý mańyzdylyǵyn aıta kele QR Prezıdenti Qasym-Jomart Toqaevqa atalǵan qozǵalysty basqarýdy usyndy.
