Qazaqstannyń jańa Mádenıet saıasatynyń tujyrymdamasy - Máńgilik El ıdeıasyna negizdeledi

ASTANA. QazAqparat - Qazaqstannyń jańa Mádenıet saıasatynyń tujyrymdamasy - Máńgilik El ıdeıasyna negizdelmek. Bul týraly Parlament Senatynda Qazaqstan Respýblıkasyndaǵy jańa Mádenıet saıasatynyń tujyrymdama jobasyn talqylaýǵa arnalǵan dóńgelek ústelde QR Mádenıet mınıstri Arystanbek Muhamedıuly málim etti.

Mınıstrdiń aıtýynsha, Elbasy tapsyrmasyna sáıkes, jańa tujyrymdama jobasynyń negizinde QR Prezıdentiniń Jarlyǵy aǵymdaǵy jyldyń 1 qyrkúıegine taman qabyldanbaq. Osyǵan oraı, memlekettik organdar men qoǵamdyq uıymdar arasynda jańa mádenıet tujyrymdamasyn talqylaý keńinen júzege asyp jatyr.

«Bizdiń maqsatymyz - shyǵarmashylyǵy men mádenıeti joǵary damyǵan otyz eldiń qatarynan kóriný. Al tujyrymdama jobasy basty úsh bólikten turady jáne olar 2015-2019 jyldarǵa, ekinshi kezeń - 2020-2030, úshinshi kezeń 2030-2050 jylǵa deıin bólinip otyr», - deıdi mınıstr.

Onyń aıtýynsha, mádenıet tujyrymdamasyna sáıkes, jalpy qazaqstandyqtardyń mádenıetke qatysty sanaly qatynasyn ózgertý kózdeledi. «Bul rette mádenıet dýman-saýyq baǵyt qana emes, rýhanı ósimniń, qoǵamnyń ıdeologııalyq damýynyń ózegi retinde qaralyp otyr. Mádenıet - memleket qurylymynyń negizi. Ekinshiden, tujyrymdamada zamanaýı mádenı klasterlerdi damytý qarastyrylǵan. Bul rette biz mádenıet salasynda biregeı básekege qabiletti ónimdi shyǵarýǵa tıispiz. Shyndyǵynda, mádenı klaster - ekonomıkanyń shyǵarmashylyq sektory, ol túrli baǵyttardy biriktire alady. Úshinshiden, bizdiń ómirimizdegi oryn alyp jatqan oqıǵalardy shyǵarmashylyq nármen ushtastyryp, qoǵamǵa etene etý jaıttary qamtylady», - deıdi A. Muhamedıuly.