Qazaqstannyń jańa Qylmystyq-atqarý kodeksinde sottalǵandardy qaıta áleýmettendirý túsinigi alǵash ret engizilip otyr - májilismen
ASTANA. QazAqparat - Jaqynda Parlamentte maquldanǵan Qazaqstannyń jańa Qylmystyq-atqarý kodeksinde sottalǵandardy qaıta áleýmettendirý túsinigi alǵash ret engizilip otyr. Bul týraly búgin Ortalyq kommýnıkatsııalar qyzmetinde ótken brıfıngte QR Parlamenti májilisiniń depýtaty Svetlana Bychkova habarlady.
"Qazirgi ýaqytta bizdiń elde túrmedegi halyqtyń sany óte kóp, ol salyq tóleýshilerdiń qaltasyna aýyr tıetini anyq. Olar jumys istep, qoǵamǵa úlken paıdalaryn ákeler edi. Biraq ol úshin jaǵdaı jasaýymyz kerek. Osyǵan oraı, jańa Qylmystyq-atqarý kodeksinde sottalǵandardy qaıta áleýmettendirý túsinigi engizildi. Onda sottalǵandardyń qoǵamnyń teń quqyly múshesi retindegi áleýmettik mártebesin qalpyna keltirý úderisi, qalypty ómir súrý saltyna qaıta oralý jaıttary naqtylanǵan", - dedi depýtat.
Onyń sózine qaraǵanda, kodeks jobasynda adamdar jazasyn ótep bolǵannan keıin olardy jumysqa ornalastyrý máselesi qaralǵan.
"Eger sottalýshy bostandyqqa shyqqannan soń oǵan jumys oryn baryn biletin bolsa jáne túrmelerdegi kásiporyndarda eńbek etip, az da bolsa ózi tapqan aqshasy qaltasynda jatsa, eger bostandyqta onyń turǵylyqty orny bolatynyn bilse, ondaı adam qoǵamda tez beıimdeledi. Keleside ol qylmystyq-atqarý júıesine qaıtadan túspeıtin bolady", - dep atap ótti S. Bychkova.
