Qazaqstannyń jańa bıýdjettik áýe kompanııasy mamyr aıynda qurylady
ASTANA. QazAqparat - 2019 jyldyń mamyr aıynda Qazaqstannyń tómendetilgen tarıf boıynsha qyzmet kórsetetin jańa áýe kompanııasy óz jumysyn bastaıdy, dep habarlaıdy QazAqparat tilshisi.
Bul týraly QR Investıtsııalar jáne damý mınıstri Jeńis Qasymbek Úkimet úıinde málimdedi.
Eske sala ketsek, 2 qarashada Memleket basshysy Investıtsııalar jáne damý mınıstri Jeńis Qasymbekti, «Samuryq-Qazyna» aktsıonerlik qoǵamy dırektorlar keńesiniń múshesi Rıchard Evansty jáne «Eır Astana» áýe kompanııasynyń prezıdenti Pıter Fosterdi qabyldaǵan bolatyn. Kezdesý sońynda Memleket basshysy «Eır Astana» bazasynda bıýdjettik áýe kompanııasyn qurýdy tapsyrdy.
«Eır Astana» josparlaryna sáıkes, jańa bıýdjettik áýe kompanııasy 2019 jyldyń mamyr aıynda ashylady.
«Jańa loýkoster «Eır Astananyń» enshiles kompanııasy bolyp qurylady jáne oǵan bıýdjetten esh qarajat bólinbeıdi. Áýe kompanııasyn qurý týraly sheshim «Eır Astana» kompanııasynyń dırektorlar keńesinde qabyldandy. Bul óte jaqsy tájirıbe. «Lufthansa», «British Airways», «Aeroflot» syndy kóptegen iri áýe kompanııalarynyń tómen baǵadaǵy bólimsheleri bar», - dedi mınıstr jýrnalısterge bergen suhbatynda.
Sonymen birge, mınıstr jańa áýe qyzmetteriniń nelikten arzan bolatynyn túsindirdi.
«Jańa áýe baǵyttarynda jolaýshylar orny kóbeıedi jáne oryndardyń ara qashyqtyǵy qysqarady. Júk aqysy bólek esepteledi. Eýropanyń «Lot» nemese «ÝızEır» jelileri ne úshin arzan? Sebebi, jolaýshylar oryn úshin aqy tóleıdi de, júk pen taǵam úshin qajet bolǵanda bólek eseptesedi. Kelesi jyly «Eır Astana» kompanııasy jańa 8 ushaq satyp alady. Ondaǵy oryndyqtar sany kóp jáne tyǵyz bolady jáne basym bóligi jańa áýe kompanııasyna beriledi», - dedi J. Qasymbek.
Mınıstrdiń aıtýynsha, jańa áýe kompanııasynyń baǵyttary ázirge anyqtalyp jatyr. Alǵashynda Qazaqstan boıynsha ushady jáne keıinirek damı kele halyqaralyq dálizge jiberiledi.
«Ádette «Eır Astana» kompanııasynda Almaty-Astana baǵyty boıynsha bılettiń ortasha quny 32-34 myń teńge. Jańa bıýdjettik áýe kompanııasynda bul baǵyttyń bıleti orta eseppen 16-18 myń teńge bolady», - dep túsindirdi Jeńis Qasymbek.
