Qazaqstannyń jańa bıozerthanasy sheteldik ǵalymdar úshin ashyq bolady - SІM

MÁSKEÝ. QazAqparat – Qazaqstanda qurylatyn tórtinshi deńgeıdegi bıozerthana halyqaralyq yntymaqtastyqqa múddeli qatysýshylar úshin ashyq bolady. Bul týraly QR Premer-Mınıstriniń orynbasary – Syrtqy ister mınıstri Muhtar Tileýberdi Reseı Syrtqy ister mınıstri Sergeı Lavrovpen ekijaqty kezdesýiniń qorytyndysy boıynsha ótken baspasóz máslıhatynda málim etti, dep habarlaıdy QazAqparat menshikti tilshisi.

«Bul - ashyq protsess, biz halyqaralyq yntymaqtastyqqa ashyqpyz. Árıne, Reseıdiń ǵalymdary, zerthanalary men ortalyqtary da osy saladaǵy yntymaqtastyqqa shaqyrylady»

, - dedi mınıstr.

Bıologııalyq qaýipsizdik máselesi halyqaralyq kún tártibindegi eń ózekti máselelerdiń biri, ásirese koronavırýs pandemııasynyń saldarymen kúresý qajettiligi kezinde mańyzdy ekeni atalyp ótti.

«Reseı Federatsııasymen osy máselelerde (bıoqaýipsizdikti qamtamasyz etý - avt.) tabysty qarym-qatynas ornatylǵan. Reseılik seriktesterge Prezıdent Qasym-Jomart Toqaevtyń BUU júıesinde Bıologııalyq qaýipsizdik jónindegi halyqaralyq agenttik qurý týraly bastamasyn qoldaǵany úshin alǵys aıtamyz. Biz óz tarapymyzdan UQShU qaýipsizdik keńesi komıteti janyndaǵy Bıologııalyq qaýipsizdik jónindegi úılestirý keńesi týraly reseılik bastamany qoldadyq. Іs júzinde biz uıymnyń jarǵysyna ózgerister engizý boıynsha tıisti hattama bekitýge shyǵyp otyrmyz»

, - dedi Muhtar Tileýberdi.

Sergeı Lavrov qazirgi ýaqytta taraptar bıologııalyq qaýipsizdikti qamtamasyz etý boıynsha ekijaqty memorandým daıyndaý aıaqtalýǵa jaqyn ekenin habarlady. Sonymen birge, keıingi jyly bıologııalyq qaýipsizdik problemasy, bıologııalyq jáne ýytty qarýǵa tyıym salý jónindegi Konventsııany nyǵaıtý máseleleri boıynsha, taraptar UQShU men TMD-ǵa múshe elderdiń memleket basshylary, mınıstrleri deńgeıinde tıisti ótinishter men qujattar qabyldady.

Buǵan deıin habarlaǵanymyzdaı, Máskeýde Qazaqstan men Reseıdiń Syrtqy ister mınıstrleri kezdesti.