Qazaqstannyń «Jalpyulttyq basymdyqtary» belgilendi
«Memlekettik josparlaý júıesine qatysty jańa tásilderdi ázirleýdiń negizgi mindeti – onyń tıimdiligin kúsheıtý boldy. Máselen, birinshi deńgeıdegi qujattar eldiń uzaq merzimdi jáne orta merzimdi kezeńdegi damý boljamyn aıqyndaıdy. «Qazaqstan – 2050» strategııasy memlekettiń uzaq merzimdi damýyn aıqyndaıtyn eldiń negizgi qujaty sanalady. Osyǵan baılanysty uzaq merzimdi qujatty iske asyrý úshin Jalpyulttyq basymdyqtar quraly engiziledi, ol «Qazaqstan – 2050» strategııasy boljamyn qysqa merzimde iske asyrý úshin (2025 jylǵa deıin) negizgi basymdyqtardy biriktiretin jáne aıqyndaıtyn biryńǵaı ınklıýzıvti platforma bolady», - dedi Qaırat Kelimbetov Úkimet otyrysynda.
Q.Kelimbetov atap ótkendeı, «Ulttyq damý jospary», «Óńirlik damý jospary», sondaı-aq «Ulttyq qaýipsizdik strategııasy» ortalyq jáne óńirlik deńgeılerde memlekettik apparattyń maqsattary men mindetterin aıqyndaıtyn bolady. Aýmaqtyq damý jospary eldegi árbir óńirdiń básekelik artyqshylyqtaryn ashýǵa baǵyttalady.
Sondaı-aq jobalyq tásilge sáıkes barlyq sıpattamalary bar ulttyq jobalar quraly engiziletin bolady.
Ekinshi deńgeıdegi qujattar óńiraralyq máseleler boıynsha da, salalar arasyndaǵy máseleler boıynsha da júrgiziletin saıasatty aıqyndaıtyn bolady.
Úshinshi deńgeıdegi qujattar – iske asyrý qujattary bolady. Memlekettik organdardyń, kvazımemlekettik uıymdardyń damý josparlary, Óńirlerdi damytý josparlary joǵaryda turǵan qujattardyń mindetterin iske asyrý jónindegi tetikterdi kórsetedi. Osylaısha, «Qazaqstan – 2050» jalpyulttyq basymdyqtary men paıymyn oryndaýǵa toǵystyrylatyn úsh deńgeıdegi barlyq qujattar arasynda naqty ózara baılanys ornatylady.
«Osyǵan baılanysty, Úkimetten Memlekettik josparlaý júıesin Úkimet qaýlysy túrinde bekitýdi suraımyz. Jalpyulttyq basymdyqtardyń quramynda úsh baǵyt boıynsha (ınstıtýttar sapasy, azamattardyń ál-aýqaty jáne kúshti ekonomıka) 10 negizgi basymdyq bar. Qazirgi ýaqytta Jalpyulttyq basymdyqtar boıynsha Prezıdent Jarlyǵy jobasy memlekettik organdarda maquldaýda jatyr. Ony memlekettik organdardyń belgili bir bóligi maquldady, qalǵandarynan da jaqyn arada qaraýdy suraımyz. Jalpyulttyq basymdyqtar týraly Jarlyq jobasyn 2021 jylǵy 10 aqpanǵa deıin qol qoıýǵa engizý qajet dep sanaımyz», - dedi Qaırat Kelimbetov.
