Qazaqstannyń jalpy rezervteri 95,6 mlrd dollardy qurap otyr - UB

ASTANA. QazAqparat - Qazaqstannyń rezervteriniń jalpy somasy búgingi kúni 95,6 mlrd dollardy qurap otyr. Búgin Aqordada ótip jatqan QR Úkimetiniń keńeıtilgen otyrysynda aqsha-kredıttik saıasat jóninde baıandaǵan QR Ulttyq bankiniń tóraǵasy Danııar Aqyshev osylaı málim etti.

«Ulttyq bank qysqa merzim ishinde aqsha jáne valıýta naryqtaryndaǵy jaǵdaıdy turaqtandyrdy. Buǵan birinshi kezekte álemdik valıýta naryǵyndaǵy jaǵdaıdyń jaqsarýy sebep boldy. Ekinshiden, Úkimet pen Ulttyq banktiń daǵdarysqa qarsy birlesken jedel sharalary áser etti», dedi Bas bankır.

Onyń aıtýyna qaraǵanda, Ulttyq banktiń altyn valıýta rezervteri tamyz aıynyń sońynda 30,7 mlrd dollardy qurady. Osy jyl basynan rezervter on paıyzǵa ıaǵnı, 2,8 mlrd dollarǵa ósti. «Ulttyq Qordyń valıýtalyq aktıvteri 64,9 mlrd dollardy qurady. Onyń deńgeıi turaqty bolyp qalýda. Bul transfertterdi Ulttyq qordan josparly túrde alýǵa qaramastan bolyp otyr. Elimizdiń rezervteriniń jalpy somasy búgingi kúni 95,6 mlrd dollardy qurap otyr», dedi D. Aqyshev.