Qazaqstannyń jalpy oqý baǵdarlamasyna «Zaıyrlylyq jáne dintaný negizderi» kýrsy enedi

ASTANA. QazAqparat - Qazaqstan Respýblıkasy Mádenıet jáne sport mınıstri Arystanbek Muhamedıuly halyq aldynda vedomstvonyń 2015 jyly mádenıet jáne sport salasynda atqarǵan jumysy týraly esep berý kezinde qoǵam ókilderimen kezdesý barysynda memlekettik-konfessııalyq baılanystar salasyndaǵy qyzmeti týraly da aqparat berdi.

Bul týraly vedomstvonyń baspasóz qyzmeti habarlady.

Memlekettik-konfessııalyq jáne konfessııaaralyq qatynastardyń úılesimdiligi salasyndaǵy mindetterdi sheshý aıasynda Mádenıet jáne sport mınıstrligi din salasyn retteıtin qoldanystaǵy zańnamany elimizdiń barlyq azamattary múltiksiz saqtaýyn qamtamasyz etedi. Osyǵan oraı halyq arasynda aqparattyq-túsindirý jumystary uıymdastyrylyp, «E-Islam»aqparattyq-aǵartýshylyq ınternet-portaly jumys isteıdi.

Dindar azamattardyń belgili bir sanatynyń, sonyń ishinde dinı ekstremızm men terrorızm úshin sottalǵan adamdar arasynda kózqarastaryn deradıkalızatsııalaý jóninde keshendi jumys júrgiziledi. Bul jumys «Aqnıet» ońaltý ortalyǵy arqyly da iske asyrylady.

«Destrýktıvti dinı aǵymdardan japa shekkenderge kómek kórsetý boıynsha táýlik boıy jumys isteıtin «Qaýyrt jeli - 114» aqparattyq-konsýltatıvti ortalyqtyń jumysy uıymdastyryldy», - dep habarlady mınıstr.

Sonymen qatar A. Muhamedıulynyń aqparaty boıynsha, Bilim jáne ǵylym mınıstrligimen birlese otyryp, «Zaıyrlylyq jáne dintaný negizderi» mindetti fakýltatıvtik kýrstyń úlgilik oqý baǵdarlamasy ázirlendi, atalǵan baǵdarlama 2016-2017 jyldardan bastap barlyq jalpy bilim beretin mekemelerde engiziletin bolady.