Qazaqstannyń jalpy ishki ónimindegi saýdanyń úlesi aldaǵy jyly da tómendeýi múmkin
ALMATY. Jeltoqsannyń 1-i. QazAqparat /Erlik Erjanuly/ - Búkilálemdik banktiń baǵalaýy boıynsha, Qazaqstan halyqaralyq saýda kórsetkishi boıynsha álemde 182 orynda keledi.
Bul búgin Almatyda ótip jatqan Qazaqstannyń saýda kásiporyndarynyń І kongresinde talqylanyp jatyr, dep habarlaıdy QazAqparat.
«Biz búgingi qurammen alǵash ret jınalyp otyrmyz. Búgingi kongrestiń pishini ádettegideı emes. Onyń ıdeıasyn Úkimet basshysy usynyp otyr. Elimizge Qyrǵyzstan Respýblıkasynyń Premer-Mınıstri kelýine oraı Astanada Mınıstrler keńesiniń májilisi ótip jatqandyqtan, bul sharaǵa Kárim Másimov beıne konferentsııa arqyly qatyspaq», deıdi Qazaqstan kásipkerler forýmy keńesiniń tóraǵasy Raıymbek Batalov. Onda Zertteu DC Group-tyń zertteýler jónindegi dırektory Marat Qaıyrlenov «Saýdany damytýdyń 2009-2010 jyldardaǵy makroekonomıkalyq perspektıvalary» týraly óz tanystyrylymyn jasady. Onyń aıtýynsha, 2010 jyly saýdany damytýdaǵy negizgi faktorlar - qarjylandyrý jaǵdaıynyń nasharlaýy, joǵary qaryz júktemesi, halyq kirisiniń qysqarýy bolmaq. Óıtkeni kásiporyndardyń aınalym qarjysy tómendep, ekinshi deńgeıli bankterdiń nesıe qorjynynyń sapasy nasharlap, saýdany qarjylandyrý máselesi de sheshilmeýde. 8 aıdyń qorytyndysyna qaraǵanda, halyqtyń suranysy aǵymdaǵy jyly 25-30 paıyzǵa nemese 4-5 mıllıard dollarǵa azaıýy múmkin. 2010 jyly 2008 jyldyń deńgeıine jetý úshin qosymsha 1,8 -2,8 mıllıard dollar qajet. Tutyný naryǵyn damytý úshin bıýdjettik qyzmetkerlerdiń jalaqysyn ulǵaıtý shildede emes, qańtar aıynan bastalatyn bolsa naryqqa 0,3 mıllıard dollar túsip, tómendep bara jatqan halyq suranysyn jan-jaqty qoldaýǵa múmkindik beredi.
