Qazaqstannyń jalpy ishki ónimindegi aýyl sharýashylyǵynyń úlesi áli tómen deńgeıde - Ekonomıka ınstıtýtynyń dırektory
ALMATY. Mamyrdyń 6-sy. QazAqparat /Erlik Erjanuly/ - Qazaqstanda bıyl aýyl sharýashylyǵy salasyndaǵy ótken jylǵy ilgerileýshilik odan ary jalǵasýda. Bul búgin Almatyda "Azııa-Tynyq muhıt aımaǵyndaǵy ekonomıkalyq jáne áleýmettik jaǵdaıǵa sholý: 2010 jyl" dep atalatyn Azııa-Tynyq muhıty aımaǵyndaǵy ekonomıkalyq jáne áleýmettik keńes (ATMEÁK) jarııalanymynyń tanystyrylymynda aıtyldy,
dep habarlaıdy QazAqparat.
"90-shy jyldary jalpy ishki ónimniń qurylymynda aýyl sharýashylyǵynyń úlesi 34 paıyz boldy. Ol keıin kúrt quldyrap, tek sońǵy jyldary qaıta jandanyp, qazir 10 paıyzǵa jýyqtady. Qazaqstan jalpy agrarlyq memleket sanalady. Bizdiń brend - et, un, astyq", deıdi Ekonomıka ınstıtýtynyń dırektory Orazaly Sábden. Ǵalymnyń aıtýynsha, brendti saqtap qalý úshin aýyl sharýashylyǵy salasyn áli de damytý qajet. Onyń jalpy ishki ónimdegi úlesin keminde 25 paıyzǵa jetkizý kerek. Bul ekonomıkanyń damýyn ornyqtyrýǵa óz septigin tıgizedi.
