Qazaqstannyń jaǵajaı voleıbolshylary ІІІ Azııalyq jaǵajaı oıyndarynda eki medal oljalady
ALMATY. 18 maýsym. QazAqparat - Qytaıdyń Haııan qalasynda ótip jatqan ІІІ Azııalyq jaǵajaı oıyndarynda qazaqstandyq sportshylar el qorjynyna alǵashqy medaldardy saldy.
12 maýsymda jalaýy kóterilgen bul dúbirli dodada birinshi bolyp jaǵajaı voleıbolshylary saıysqa tústi. Onda erler arasynda - 34, áıelder arasynda - 18 komanda baq talastyrdy. Erler arasynda jartylaı jáne aqtyq synda bir-birimen ózara kezdesken Qazaqstan men Indonezııa sportshylary júldeli oryndardy ózara bólisti. Onda aldymen Alekseı Sıdorenko men Aleksandr Dıachenkony, odan keıin Dmıtrıı ıAkovlev pen Alekseı Kýleshovten aılasyn asyrǵan Darkýnsoro men Rashmaýan jeńimpaz atandy. Al Dmıtrıı men Alekseı - kúmis, Alekseı men Aleksandr qola júldeni qanaǵat tutty. Buǵan deıin D.ıAkovlev pen A.Sıdorenko 2010 jyly Omanda ótken dodada da kúmis júldeniń ıesi atanǵan bolatyn. Bıyl sondaı-aq, áıelder arasynda baq synaǵan qazaqstandyq Tatıana Mashkova men Irına Tsymbalova jartylaı synda taılandtyqtarǵa, aqtyq synda taıpeılikterge utylyp, úzdik úshtiktiń qataryna ene almady.
