Qazaqstannyń zań mamandary ázerbaıjandyq áriptesterimen kezdesti
Atalmysh sapar Germanııanyń halyqaralyq yntymaqtastyq qoǵamynyń (GIZ) qatysýymen ótti. Atap aıtqanda, jıyn GIZ baǵdarlamasynyń «Ortalyq Azııa elderinde quqyqtyq memlekettilikti ilgeriletý» baǵdarlamasynyń dırektory jáne ulttyq úılestirýshisiniń qatysýymen uıymdastyrylyp otyr. Delegatsııa quramynda mamandandyrylǵan sot alqasynyń tóraǵasy, Parlament Senatynyń depýtaty, Joǵarǵy Sot departamenti bastyǵynyń orynbasary jáne Bas prokýrordyń Quqyqtyq statıstıka jáne arnaıy esepke alý jónindegi komıteti tóraǵasynyń orynbasary bar.
Jaqyp Asanov Ázerbaıjan Joǵarǵy Sotynyń tóraǵasymen, Parlamenttiń quqyqtyq saıasat jáne memlekettik qurylys komıtetiniń tóraǵasymen kezdesti. Áńgime barysynda taraptar memleketter arasyndaǵy qatynastardyń damýyndaǵy oń dınamıkany erekshe atap ótip, eki eldiń ádilet organdarynyń odan ári jemisti yntymaqtastyǵyna senim bildirdi. Sonymen qatar, Jaqyp Asanov ázerbaıjandyq áriptesterin qazaqstandyq sot júıesindegi negizgi ózgeristermen tanystyrdy. Atap aıtqanda, sýdıa bolýǵa úmitkerlerdi irikteýdi kúsheıtý, sýdıalardyń kásibı qyzmetin baǵalaýdyń jańa ádisterin, sot aktileriniń jańa formatyn jáne úkim jarııalanǵannan keıin onyń mánin túsindirý tájirıbesin engizý jumystarymen tanystyrdy. Sondaı-aq, biryńǵaı sot praktıkasyn qalyptastyrý, azamattardy qabyldaý ortalyqtarynyń jumysy men sottan tys tatýlasý, tatýlastyrýshy sýdıalar, otbasylyq jáne túngi sottar, front-keńselerdiń qyzmeti týraly aıtyldy.
Áńgime barysynda Jaqyp Asanov tájirıbe almasýdyń tıimdiligine toqtaldy. Sondaı-aq, ol qoǵamdyq-quqyqtyq daýlardy qaraýdaǵy sot praktıkasyn, bitimgershilik rásimderdi zertteýge qyzyǵýshylyq bildirdi.
Óz kezeginde Ázerbaıjan Joǵarǵy sotynyń tóraǵasy ózara tıimdi seriktestik qaǵıdattary boıynsha ekijaqty qatynastardy nyǵaıtýǵa qyzmet etetin yntymaqtastyqty odan ári tereńdetý qajettiligin atap ótti. Sonymen birge, ol ákimshilik ádilet ornatý, zamanǵa saı sot ınfraqurylymyn qurý, sýdıalardy irikteý jáne jańa elektrondyq júıelerdi paıdalaný salasyndaǵy tájirıbesin qazaqstandyq áriptesterimen bólisýge daıyn eken atap ótti.
Sondaı-aq, qazaqstandyq delegatsııa ákimshilik-ekonomıkalyq jáne apellıatsııalyq sottarda, advokattar alqasynda bolyp, onda Qazaqstan Respýblıkasynyń Ákimshilik is júrgizý kodeksi jobasynyń aspektilerin talqylady.
Avtory Bekbaý Taımanov
