Qazaqstannyń ıadrolyq qarýsyzdanýynyń saıası aspektileri brıtanııalyq alańda talqylandy
Іs-sharanyń moderatory Brıtan-Qazaqstan qoǵamynyń tóraǵasy Rýpert Gýdman boldy. Ol qatysýshylarǵa AQSh-tyń burynǵy senatory Sem Nann men Ulybrıtanııa Premer-mınıstri Borıs Djonsonnyń quttyqtaý joldaýlaryn tabys etti. Senator S. Nann óz hatynda Qazaqstannyń Tuńǵysh Prezıdenti Nursultan Nazarbaevtyń Semeı synaq polıgonyn jabý týraly batyl sheshimi men ıadrolyq qarýdy taratpaý jáne ıadrolyq qaýipsizdik salasyndaǵy basqa da bastamalary týraly eske salǵan. Ulybrıtanııa úkimetiniń basshysy táýelsizdiktiń 30 jyly ishinde Qazaqstan eleýli tabystarǵa qol jetkizgenin atap ótip, ekijaqty qatynastardyń odan ári damýyna senim bildirgen.
Qazaqstannyń Ulybrıtanııadaǵy Elshisi Erlan Ydyrysov óz sózinde Semeı polıgonyn jabý týraly sheshim qabyldanǵan jaǵdaıdy eske saldy. Tuńǵysh Prezıdent Nursultan Nazarbaev halyqtyń pikirine súıene otyryp, KSRO áskerı qolbasshylyǵynyń ustanymyna tikeleı qaıshy keletin batyl qadam jasady. Bul bastama jahandyq antııadrolyq qozǵalystyń kóshbasshysy retinde Qazaqstannyń qazirgi bet-beınesin qalyptastyrdy. Prezıdent Qasym-Jomart Toqaev jahandyq ıadrolyq qarýsyzdaný úderisterin qoldaýda dáıekti saıasatty jalǵastyryp jatyr.
Ekinshi negizgi spıker retinde Atom qýaty halyqaralyq agenttigi (AQHA) janyndaǵy Ulybrıtanııanyń burynǵy Turaqty ókili Pıter Djenkıns sóz sóıledi. Ol ıadrolyq qarýsyzdaný salasyndaǵy aǵymdaǵy jahandyq ahýalǵa tereń sholý jasaı otyryp, búgingi tańda ıadrolyq memleketter ıadrolyq arsenaldardy ulǵaıtýdy jáne jańǵyrtýdy jalǵastyryp jatqanyn, sondaı-aq ıadrolyq qarý jarysynyń bolýy múmkin jańa kezeńiniń belgileri paıda bolyp jatqanyn atap ótti.
R. Gýdman is-sharany qorytyndylaı kele, halyqaralyq qaýipsizdikti, beıbitshilik pen órkendeýdi saqtaý isinde úkimetter men sarapshylar arasyndaǵy qazaqstandyq-brıtanııalyq dıalogty qoldaýdyń mańyzdylyǵyn atap ótti.
Taıaý ýaqytta Brıtan-Qazaqstan qoǵamy Qazaqstannyń ıadrolyq qarýsyzdanýynyń tehnıkalyq jaǵyna nazar aýdaratyn taǵy bir vebınar ótkizýdi josparlap otyr.
