Qazaqstannyń ıadrolyq ınfraqurylymyna keshendi sholý jasalady
Aıta keterligi, atom energııasyn damytý salasynda QR men Atom energııasy jónindegi halyqaralyq agenttiktiń arasyndaǵy yntymaqtastyq jónindegi jospar aıasynda búginnen bastap 7 qarashaǵa deıingi kezeńde Astana qalasynda AEHA ókilderi men sarapshylarynyń qatysýymen Qazaqstannyń ıadrolyq ınfraqurylymyna keshendi sholý jónindegi mıssııa (INIR mıssııasy (INIR Integrated Nuclear Infrastructure Review) ótedi. Delegatsııa basshysy AEHA Atom energetıkasy departamenti ıAdrolyq energetıka bóliminiń dırektory doktor Dohı Han. Sondaı-aq delegatsııanyń quramyna AEHA-nyń shtattyq qyzmetkerleri jáne shaqyrylǵan halyqaralyq sarapshylar kirgen.
«Mıssııa 7 qarashaǵa deıin jalǵasady. Biz ózimizdiń ınfraqurylymyzǵa shynaıy baǵa jasap, atom energetıkalyq damý jáne júzege asyrylyp jatqan ıadrolyq ınfraqurylym baǵdarlamalarymyzdy túsingimiz keledi», - dedi kezdesýden keıin BAQ ókilderine arnalǵan baspasóz máslıhatyn barysynda elimizdiń Energetıka vıtse-mınıstri Baqytjan Jaqsalıev.
Óz kezeginde Atom energııasy jónindegi halyqaralyq agenttik ókili Dohı Han mıssııanyń negizi maqsaty MAGATE-ge múshe memlekettiń atom energetıkasy salasynda ınfraqurylymyn damytýǵa jáne ony júzege asyrýǵa kómek kórsetý ekendigin basa aıtty.
«Baǵalaý ulttyq ustanym, ıadrolyq qaýipsizdik, qarjylandyrý syndy 19 ólshem boıynsha júrgiziledi. Biz óńirlerdegi nysandarǵa barmaımyz. Degenmen, Qazaqstan osynaý mıssııa qarsańynda ázirlegen ózin-ózi baǵalaý esebine nazar aýdaratyn bolamyz», - dedi ol.
Aıta keteıik, INIR mıssııasynyń maqsaty ıadrolyq-energetıkalyq ınfraqurylymnyń damý mártebesin anyqtaý kezinde Atom energııasy jónindegi halyqaralyq agentikke múshe memleketke kómek kórsetý, atom energetıkalyq baǵdarlamany iske asyrý úshin qajetti ınfraqurylymdy keshendi baǵalaý. Infraqurylymdy keshendi baǵalaý suhbat, nysandarǵa barý jáne normatıvtik qujattardy sholý arqyly, sonymen qatar eldiń ózin-ózi baǵalaýy boıynsha esepke súıene otyryp, 19 ólshem boıynsha jasalady.
