Qazaqstannyń vokzaldary men áýejaılarynda múgedekterge jaǵdaı jasaý zańmen mindetteledi

ASTANA. QazAqparat - Qazaqstannyń temirjol vokzaldary men áýejaılarynda, aıaldamalary men basqa da ınfraqurylymdyq oryndarynda múgedekterge jaǵdaı jasaý zańmen mindetteledi. Bul týraly búgin QR Májilisinde «Qazaqstan Respýblıkasynyń keıbir zańnamalyq aktilerine múgedekterdiń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda QR Densaýlyq saqtaý jáne áleýmettik damý vıtse-mınıstri Svetlana Jaqypova aıtty.

«Qazirgi tańda múgedekterge qatysty máseleler óte kóp. Áleýmettik kólik jáne ınfraqurylymdyq nysandardyń 77 paıyzy múgedekterge qoljetimsiz. Mektepke deıingi mekemelerdiń 96 paıyzynda jáne mektepterdiń 83 paıyzynda ınklıýzıvti bilim berýge jaǵdaı jasalmaǵan. Múgedekterde qoljetimdi ortany zańnamalyq jáne normatıvtik retteý jetildirilmegen. Qoljetimdi ortany qurý úshin memlekettik bıliktiń, bıznestiń jáne qoǵamdyq uıymdardyń ózara qarym-qatynasy joq. Ázirlengen zań jobasy múgedekterdi saıası, áleýmettik, ekonomıkalyq, mádenı jáne QR Konstıtýtsııasynda, sondaı-aq, elimiz qatysatyn Halyqaralyq sharttarda kórsetilgen basqa da quqyqtary men bostandyqtaryn iske asyrýda barlyq azamattarmen teń múmkindiktermen qamtamasyz etýge baǵyttalǵan», - deıdi S. Jaqypova.

Ata keteıik, zań jobasy 24 normatıvtik-quqyqtyq aktige, onyń ishinde 4 kodekske ózgerister engizedi.

«Ózgertýler men tolyqtyrýlar boıynsha vokzaldar men áýejaılarda qoljetimdi orta qurý, jolaýshylar aıaldamasyn jaılastyrý, arnaıy jol belgileri men siltegishterdi, dybystyq qurylǵylardy ornatý, temirjol quramyn múgedekterge qoljetimdi vagondarmen jabdyqtaý, ınvataksı qyzmetin damytý, kólik ınfraqurylymy mańynda oryndar uıymdastyrý, jolaýshylar tasymaldaýdy júzege asyratyn kólik qyzmetkerlerin múgedektermen qarym-qatynas jasaý daǵdylaryna oqytý sııaqty sharalar qarastyrylǵan», - dep túsindirdi vıtse-mınıstr.