Qazaqstannyń vızasyz saıasaty qytaılyq týrısterdi qyzyqtyrýda – sheteldegi qazaq baspasózi
ASTANA. QazAqparat - «QazAqparat» HAA shet elde qazaq tilinde taraıtyn aqparat kózderine aptalyq sholýyn usynady.
Qazaqstannyń vızasyz saıasaty qytaılyq týrısterdi qyzyqtyrady – People.cn
2022 jylǵy 8 shildeden bastap Qazaqstan Qytaı sııaqty elderdiń azamattary úshin eń uzaq merzimi 14 kún bolatyn birjaqty vızasyz júıeni engizgen bolatyn. Soǵan baılanysty qytaılyq týrısterdiń nazary Qazaqstanǵa aýa bastaǵan. Bul týraly osy aptada Qytaıdyń People.cn aqparat portaly habarlady.
Atalǵan basylymnyń málimetinshe, Qazaqstanǵa vızasyz barýǵa bolatynyn bilgennen keıin Gýanchjoýlyq Sıaoıan esimdi saıahatshy Shyńjańda shańǵy teýip júrgende bıylǵy kóktemgi festıvaldi Qazaqstanda ótkizý týraly oı kelgen. Sóıtip ol merekeni Qazaqstanda ótkizedi.
Onyń aıtýynsha, basynda shetelge shyǵý oıynda bolmaǵan. Shańǵy tebýdi Shyńjańnyń soltústiginde josparlaǵan. Qazaqstanǵa vızasyz barýǵa bolatynyn bilgennen keıin, sondaı-aq Shyńjańnan Qazaqstanǵa jol júrý yńǵaıly bolǵandyqtan osy sapardy qarastyrǵan.
Týrıst Qorǵas qurlyq shekarasy arqyly ótip, Almatyǵa barady.
Qytaıdyń People.cn aqparat portalynyń dereginshe, Sıaoıan shańǵy sportyn jaqsy kórgendikten Almatyǵa degen kózqarasy erek. «Munda Azııadaǵy eń bıik jáne eń úzdik taý shańǵysy kýrorttary bar. Almatydaǵy taý shańǵysy kýrorttarynyń qurylǵylary men jabdyqtary sapaly, qar joldary erekshe ári oǵan dámdi tamaqty qosyńyz. Sondaı-aq jyly aýa raıy men ásem tabıǵatta demalyp, tamasha sezimge bólendim», - deıdi týrıst Sıaoıan.
Sıaoıanǵa Qazaqstannyń burynǵy astanasy Almatynyń tarıhı tamyry tereńde jatýymen qatar, Almatyda taýar baǵasy el ishimen salystyrǵanda tómendigimen unaǵan...
Sondaı-aq People.cn aqparat portalynda «Shyńjań Qanas: Tabıǵat týdyrǵan tańǵajaıyp keskindeme» degen taqyryptaǵy sýretti aqparat jaryq kórdi.
Atalǵan basylymnyń málimetine qaraǵanda, Shyńjańnyń Altaı óńiri muz ben qardyń erekshe resýrstarymen tanymal. Sońǵy jyldary kórkem Qanas aýmaǵy ekotýrızmdi, mádenı jáne aýyldyq týrızmdi ıntegratsııalaý men damytýǵa kóp kúsh jumsaǵan. Sonymen qatar qar-muz týrızminiń jańa qyryn ashý, ózderiniń negizgi qyzmetterin únemi jetildirip otyrý sharalaryn iske asyryp keledi.
«Birazdan beri kórkem Qanas aýdany kúmispen kómkerildi. Nefrıt beldeýi sııaqtanǵan Qanas ózeni qar men muzdyń arasynda shıyrshyq atyp, kóz aldyńyzǵa tańǵajaıyp sýretti elestetedi. Taý etegine deıin shókken bulttar alystaǵy taýdy dál aldyńyzǵa ákelip qoıǵandaı áser beredi», dep jazady People.cn.
Elshi Qazaqstan men Iran ýnıversıtetteri arasynda áriptestikti damytý keregin aıtty – Parstoday
Irandaǵy Qazaqstan elshisi Asqat Orazbaı men onyń keńesshisi Dáýirbek Dúısebaı Sharıf tehnologııa ýnıversıtetine baryp, osy JOO men Qazaqstandaǵy bedeldi oqý oryndary arasynda ǵylym men tehnologııa salasynda áriptestikti damytý keregin basa aıtty, dep habarlaıdy Parstoday aqparat agenttigi.
Atalǵan ýnıversıtet pen Qazaqstannyń úzdik JOO-lary arasynda yntymaqtastyqty damytý maqsatynda ýnıversıtet rektory Rasýl Djalılı bir top pedagogtiń qatysýymen jınalys ótkizgen.
Iran basylymynyń dereginshe, jınalysta ustaz jáne stýdentpen almasý, Qazaqstandaǵy bedeldi oqý oryndarymen birlese jobany iske asyrý jáne Kısh halyqaralyq oqý ortalyǵynda eki elge jaramdy sertıfıkat beriletin kýrstardy ótkizý sııaqty taqyryptar talqylandy.
Aımaq ákimine Arman Qýanǵanulynyń kandıdatýrasyn qoldady
– Kaznews
9 aqpan kúni Baıan-Ólgıı aımaǵynyń Azamattyq ókilderi máslıhatynyń kezekti XII otyrysy ótti. Aımaq depýtattary biraýyzdan aımaqtyń jańa ákimine Arman Qýanǵanulynyń kandıdatýrasyn qoldap, Mońǵolııa premer-mınıstrine usyndy, dep habarlaıdy Mońǵolııanyń Kaznews aqparat portaly.
Atalǵan BAQ-tyń málimetinshe, aımaq ákimine taǵaıyndaý týraly ókimdi Mońǵolııa premer-mınıstri shyǵaratyn bolady.
Aıta keteıik, Arman Qýanǵanuly 1983 jyly týǵan. Gýmanıtarlyq ýnıversıtetti «bıznes, ekonomıst» mamandyǵymen aıaqtap, 2007 jyly bıznes basqarý salasynyń magıstri atandy.
Aımaqtyq Aqparattyq-kommýnıkatsııa jelisi memlekettik kásipornynda dırektor, 2021 jyldan Baıan-Ólgıı aımaǵy ákiminiń orynbasary qyzmetin atqarǵan.
Sondaı-aq osy aptada mońǵolııalyq BAQ-ta «Ulanbatyrda Qajymurat Sheshenqulynyń án keshi ótedi» degen aqparat jarııalandy.
Kaznews-tiń dereginshe, qazaqstandyq tanymal ánshi Qajymurat Sheshenqululy aqpannyń 8 kúni Ulanbatyr qalasy «HOLIDAY INN» meıramhanasynda shyǵarmashylyq kesh ótkizedi.
Aıta keteıik, «Qara jorǵa», «Maqpaljan», «Búldirgen qyz», «Seni ǵana» ánderimen tanymal bolǵan Q.Sheshenqululy – Qytaı Halyq Respýblıkasy, Altaı aımaǵy Qaba aýdanynyń týmasy. Ol búginde óziniń ánshilik, sazgerlik darynymen tyńdarmannyń júregine jol taýyp, ónersúıer qaýymnyń ystyq yqylasyna bólenip júr.
Álemdegi eń úlken balshyqty janartaýdyń biri atqylaı bastady – ÓzA
Túrkimenstannyń ońtústik-batysynda álemdegi eń úlken balshyqty janartaýdyń biri Akpotlovýk atqylaı bastady. Jer astynan topyraq, sý, munaı jáne shógindi jynystardyń qospasynan quralǵan balshyq atqylap, kúkirtti sýteginiń ıisi aýaǵa taralyp jatyr, dep habarlaıdy ÓzA aqparat agenttigi.
Atalǵan basylymnyń keltirgen málimetine súıensek, ekolog Meretdýrdı Kıchımovtyń aıtýynsha, janartaý ártúrli sebeppen oıanýy múmkin. Gazdardyń bir jerde jınalýynan jerasty sýlary janartaýǵa jyldam enip jatqan bolýy múmkin Olar tasty jumsartady, ony sazǵa aınaldyrady. Ázirge bul atqylaý – qaýipsiz. Onyń qansha ýaqytqa sozylatynyn boljaý qıyn. Biraq ádette ol birneshe kúnge jalǵasady.
Aıta keteıik, Akpotlovýk janartaýynyń bıiktigi shamamen 80 m, al ortalyq bóliginde dıametri shamamen 150 metr bolatyn belsendi gazdy-balshyqty kól bar. Janartaýdan shyqqan balshyq emdik maqsatta qoldanylady.
Qazaqstannan qutqarýshylardyń ekinshi toby keledi – TRT
QR Prezıdenti Qasym-Jomart Toqaev Túrkııa Respýblıkasynyń Qazaqstandaǵy elshiligine baryp, baýyrlas eldiń ońtústik-shyǵysynda bolǵan alapat zilzala saldarynan myńdaǵan adamnyń qaza tabýyna baılanysty kóńil aıtty.
Bul týraly osy aptada Túrkııa Radıo Televızııa portaly habarlaǵan bolatyn.
«Sondaı-aq Qazaqstannyń jan-jaqty qoldaý kórsetetinin jetkizdi. Prezıdent kóńil aıtý kitabyna jazba qaldyrdy», dep jazady TRT.
Atalǵan basylymda sonymen qatar, «Qazaqstannan Túrkııaǵa qoldaý kelip jetti» degen taqyrypta aqparatta jarııalandy.
TRT-nyń dereginshe, Qazaqstannan Túrkııadaǵy jer silkinisinen zardap shekken aımaqtarda izdestirý-qutqarý jumystaryna qatysatyn 41 adamnan turatyn izdeý-qutqarý toby kelip jetken. Bortynda kerekti qural-jabdyqtar men arnaıy kólikteri bar ushaq Gazıantep áýejaıyna qonǵan.
Apta sońynda «Qazaqstannan qutqarýshylardyń ekinshi toby keledi» degen aqparatty túrkııalyq basylym «QazAqparat» Halyqaralyq aqparat agenttigine silteme jasap habarlady.
Eske sala keteıik, tıisti tapsyrmany Qazaqstan Prezıdenti Qasym-Jomart Toqaev bergen bolatyn.
Qazaqstan TJM qutqarýshylarynyń taǵy bir borty joıqyn jer silkinisiniń saldaryn joıýǵa kómek kórsetý múmkindikterin keńeıtý úshin Túrkııaǵa ushady.
Ekinshi eshelon quramynda jeke quramnan 60 adam, olardyń ishinde TJM qutqarýshylary, Apattar medıtsınasy ortalyǵynyń dárigerleri, kınologııalyq esepter bar. TJM jedel áreket etý kúshterinde avarııalyq-qutqarý quraldary men jabdyqtardyń 150-ge jýyq jáne dári-dármekterdiń 160-tan astam túri bar.
Aıta keteıik, 6 aqpan kúni Túrkııada bolǵan joıqyn zilzalada zardap shekkenderge kómek kórsetý úshin álemniń kóptegen eli jumylyp jatyr.
Qazirgi ýaqytta qulaǵan ǵımarattardyń úıindileri astynda qalǵan adamdardy qutqarý jumystary toqtaýsyz jalǵasýda.
Qazaqstan parlamenti Ózbekstanmen tutqyndardy almasý týraly kelisimdi ratıfıkatsııalady - ÓzA
Qazaqstan Respýblıkasynyń Parlamenti Ózbekstanmen tutqyndardy almasý týraly kelisimdi ratıfıkatsııalady.Senat saıtyndaǵy habarǵa sáıkes QR Senatynyń spıkeri Máýlen Áshimbaevtiń tóraǵalyǵymen 9 aqpanda Palata otyrysy ótip, onda depýtattar birqatar zańdy qarap, maquldady.
Bul týraly osy aptada ózbekstandyq ÓzA aqparat agenttigi de habarlady.
Atalǵan BAQ-tyń dereginshe, Senat depýtattary «Qazaqstan Respýblıkasy men Ózbekstan Respýblıkasy arasyndaǵy bas bostandyǵynan aıyrýǵa sottalǵan adamdardy jazasyn odan ápi óteý úshin berý týraly shartty ratıfıkatsııalaý týraly» zańdy qarap, maquldady.
«Bul Sharttyń maqsaty – sottalǵandardyń jazasyn óz elderinde óteýine, túzelip, qoǵamdyq ómirge qaıta beıimdelýine járdemdesý. Senat Tóraǵasy atap ótkendeı, zań baýyrlas eki el arasynda quqyq qorǵaý salasyndaǵy seriktestikti odan ári nyǵaıtýǵa múmkindik beretini aıtylǵan aqparatta», dep túıindeıdi ózbekstandyq basylym.
