Qazaqstannyń Vengrııadaǵy Elshiliginde «DIAQB» Saılaýlar jónindegi departamentiniń basshylyǵymen kezdesý ótti
ASTANA. Aqpannyń 2-si. QazAqparat. Eýropadaǵy qaýipsizdik jáne yntymaqtastyq uıymy Demokratııalyq ınstıtýttar men adam quqyqtary jónindegi bıýrosynyń (DIAQB) bastamasy boıynsha 2010 jylǵy qańtardyń 29-da Qazaqstannyń Vengrııadaǵy Elshiliginde «DIAQB» Saılaýlar jónindegi departamentiniń basshylyǵy Beata Martın-Rozýmılovıch jáne Igor Dolgıhpen kezdesý ótti,
dep habarlady Qazaqstannyń Vengrııadaǵy Elshiliginen.
Býdapeshtte saparda bolǵan «DIAQB» mıssııasynyń maqsaty Vengrııanyń saılaýaldy ahýalyn baǵalaý men osy elde bıyl sáýirde josparlanǵan parlamenttik saılaýlardy baqylaý ádistemesine usynystar daıyndaý bolyp tabylady.
Vengrııa Prezıdenti Laslo Shoıomnyń jarlyǵyna sáıkes, eldiń Parlamenti - Memlekettik jınalys saılaýynyń birinshi aınalymy - bıyl 11-shi sáýir, al ekinshi aınalymy - 25 sáýir bolyp belgilendi.
Bıýro mıssııasynyń ótinishi boıynsha, atalmysh kezdesý barysynda Vengrııadaǵy qazirgi saılaýaldy ahýal men onyń boljamdary jóninde EQYU-nyń qazirgi tóraǵasynyń Elshiligi retinde ókildik pikir bólisti.
Jalpy alǵanda, Elshilik tarapynan vengr bılik oryndarynyń parlamenttik saılaýlar ótkizý jónindegi daıyndyqtaryna ońdy baǵa beriletini málimdendi. 1994 jyly EQYU tóraǵasy bolǵan jáne Býdapeshttegi sammıtte Eýropadaǵy qaýipsizdik jáne yntymaqtastyq jónindegi keńesti EQYU retinde ataý týraly tarıhı sheshim qabyldanǵan osy Eýropalyq el, jalpylaı qabyldanǵan demokratııalyq standarttarǵa sáıkes saılaý protsesterin ótkizýde mol tájirıbege ıe.
Sondaı-aq kezdesý barysynda 2010 jyly 14 qańtarda Vena qalasynda ótken EQYU Turaqty keńesiniń 789-shy otyrysyndaǵy QR Prezıdenti Nursultan Nazarbaevtyń beıne-joldaýy men Uıymnyń qazirgi tóraǵasy, QR Memlekettik hatshysy - Syrtqy ister mınıstri Qanat Saýdabaevtyń baıandamasynda belgilengen gýmanıtarlyq qundylyqtar jónindegi basym mindetterdi tıimdi iske asyrý maqsatynda qazaqstandyq ókildik pen «DIAQB» arasyndaǵy ózara árekettesýdiń qyzmettik sıpattary talqylandy.
