Qazaqstannyń úzdik jeńil atletteri marapattaldy
ASTANA. QazAqparat - Búgin Astanada QR jeńil atletıka federatsııasynyń prezıdenti Ádilbek Jaqsybekov pen Mádenıet jáne sport mınıstri Arystanbek Muhamedıuly jyl úzdikterin marapattady, dep habarlaıdy QazAqparat federatsııa baspasóz qyzmetine silteme jasap.
Atalǵan sharada Ashhabadta ótken jabyq keshendegi Azııa oıyndarynyń jeńimpazdary men júldegerleri federatsııa prezıdentiniń qolynan alǵys hatpen qarjylaı syıaqy aldy.
Esterińizde bolsa, Túrikmenstan astanasynda Qazaqstan jeńil atletteri jalpy sany 10 medal jeńip alǵan bolatyn. Onyń ishinde 6 altyn, 1 kúmis, 3 qola medal bar. Olga Rypakova úsh qarǵyp jáne uzyndyqqa sekirýden top jarsa, Vıktorııa Zıabkına 60 metrge júgirýdiń úzdigi atanǵan. Syryqpen sekirýshi Sergeı Grıgorev pen ıadro serpýshi Ivan Ivanov jáne 400 metrge júgirýshi Elına Mıhına da chempıondardyń qatarynda. Sondaı-aq júldegerler qatarynda Marııa Ovchınnıkova (úsh qarǵyp sekirý), Olga Safronova (60 metrge júgirý), Anastasııa Vınogradova (60 metrge tosqaýyldar arqyly júgirý) bar.
Bıylǵy jyly Londonda ótken álem chempıonatynda qola júlde enshilegen, «Gaýhar lıganyń» fınaldyq kezeńiniń jeńimpazy atanǵan Olga Rypakova «Jyldyń úzdik jeńil atleti» atandy.
«Jeńil atletıka federatsıasynyń sportshylardyń eńbegin baǵalap, osyndaı qurmet kórsetip jatqanyna alǵys bildiremin. Shynyn aıtý kerek, mundaı marapat alǵash ret bolyp tur. Sondyqtan sportshylar federatsııanyń qazirgi basshylyǵyna alǵysyn bildiredi», - dedi Olga Rypakova.
Al «2017 jylǵy eń úzdik joba» bolyp, «ALTAY athletics» klýby tanyldy. Júlde klýbtyń qurylýyna óz úlesin qosqan Shyǵys Qazaqstan oblysynyń ákimi Danıal Ahmetovke tabystaldy.
«Jyldyń úzdik aımaqtyq federatsııasy» nomınatsııasyn Qaraǵandy oblysy jeńip aldy. Saltanatty sharaǵa oblystyq federatsııanyń prezıdenti, Qaraǵandy oblysy ákiminiń orynbasary Asylbek Dúısebaev qatysty.
Odan bólek, Ulttyq Olımpıada komıteti 25 jyldyq mereıtoıyna baılanysty daıyndaǵan Olımpıada oıyndarynda atoı salǵan jeńil atletter Olga Shıshıgına men Dmıtrıı Karpovqa arnaıy tósbelgi tabystaldy.
