Qazaqstannyń úzdik jas tennısshileri anyqtaldy
NUR-SULTAN. QazAqparat – Almatydaǵy «Eıs» tennıs ortalyǵynda tennısten Qazaqstan jasóspirimder chempıonatynyń fınalısteri anyqtaldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, birinshiliktiń ótken jylǵy jeńimpazy Janel Rústemova jartylaı fınalda saǵat jarymǵa sozylǵan tartysty básekede Erkejan Arystanbekovadan 7:6 (7:4), 6:4 esebimen basym tústi.
Matchtan keıin J.Rústemova el chempıonatynda ekinshi ret fınalǵa ótkenine rıza ekendigin, erteńgi oıynda baryn salatynyn jetkizdi.
Fınalǵa taǵy bir joldamany Aııa Nupbaı jeńip aldy. Ol Erkejannyń sińlisi Asyljan Arystanbekovany 7:5, 0:6, 6:3 esebimen tize búktirdi.
Bozbalalar arasynda fınalǵa alǵashqy bolyp qaraǵandylyq Arslanbek Aıtqulov shyqty. Ol pavlodarlyq Ilıa Vedmedti 6:4, 6:3 esebimen qapy qaldyrdy. Elordalyq Islam Orynbasar jartylaı fınalda almatylyq Janger Almashevti 6:4, 6:3 esebimen utty.
Jeńilgen tennısshiler qola júlde úshin kortqa shyǵady.
Erteń sondaı-aq juptyq synda jeńimpaz-júldegerler anyqtalady. Qyzdar arasynda Erkejan men Asyljan Arystanbekovalar elordalyq Janel Ospanova men shymkenttik Ádemi Amankeldimen chempıondyq ataqty sarapqa salady. Bozbalalardan I.Orynbasar men aqtaýlyq Danıal Rahmatýllaev sońǵy básekede aqtóbelik Aleksandr Chernomaz ben qaraǵandylyq A.Aıtqulovpen kezdesedi.
Almatylyqtar Elena Kım men Marııa Sınıtsyna – elordalyq Ýlıana Romanova men almatylyq A.Nupbaı, qyzylordalyq Erasyl Erdilda men almatylyq Danııl Felker – almatylyqtar J.Almashev pen Kırıll Kolganov juptary qola medal úshin talasady.
Eske sala keteıik, budan buryn Aleksandr Býblıktiń Maıamı týrnıriniń jartylaı fınalyna shyǵa almaǵanyn jazǵan bolatynbyz.
