Qazaqstannyń úzdik jas ǵalymy ataǵyna baıqaý jarııalandy - NATD
ASTANA. QazAqparat - Kúzde Qazaqstanda Ulttyq ınnovatsııalar baıqaýy ótedi. Bul týraly búgin Ortalyq kommýnıkatsııalar qyzmetinde ótken baspasóz máslıhatynda «Tehnologııalyq damý jónindegi ulttyq agenttik» AQ (NATD) basqarma tóraǵasynyń orynbasary Jumataı Sálimov málim etti.
Baıqaý "Mektep oqýshylary arasyndaǵy úzdik ınnovatsııalyq joba", "Úzdik jas ǵalym", "Startap komandalarǵa arnalǵan Technation akseleratsııalyq baǵdarlama", "Úzdik ratsıonalızatsııalyq sheshim", "Ratsıonalızatsııalyq jobalardy kásiporyndarda qoldaýdyń úzdik júıesi" atalymdary boıynsha ótpek.
"Biz bıyl Qazaqstannyń eń úzdik úsh jas ǵalymyn anyqtaǵymyz keledi. Biz óz tarapymyzdan qarjylyq syıaqy daıyndaımyz: birinshi orynǵa - 7,5 mln. teńge, ekinshi orynǵa - 2,5 mln. teńge, úshinshi orynǵa - 1 mln. teńge. Qazaqstan úkimetiniń tapsyrmasy memlekettik bıýdjet esebinen jasalyp jatyr", - dedi ol.
"Ǵylym jolyn tańdaǵan jas ǵalym - batyr adam. Bul mamandyq Qazaqstanda, ókinishke oraı, tartymdy emes. Biz solardyń ishinen myqtylardy anyqtap, eńbekterin yntalandyrǵymyz keledi. Túkpirdegi aýyldar da bilse deımiz, sebebi eń myqty ǵalymdar sol jerlerden de shyǵa alady", - deıdi J. Sálimov.
Onyń sózine qaraǵanda, qazylar músheliginde Tehnologııalardy kommertsııalandyrý ortalyǵynan Damır Egizbaev, "Chocolife" basshysy Ramıl Mýhrıapov bolmaq.
"Mobıldi tehnologııalar boıynsha Arman Súleımenov bar, "Bolashaq" túlegi, ol qazir Qazaqstanda startap mektepterin ashýda. «Arta Software» kompanııasynyń negizin qalaýshy Bolat Basheev, "Open Technologies" kompanııasynyń basshysy Qaırat Ahmetov. Sonymen qatar Sılıkon alabynan da eń úzdik ınnovatorlar bolady. Qazaqstan óziniń qazanynda qaınamaýy tıis. Biz jahandyq naryqqa shyǵatyn jobalarmen aınalysýymyz kerek. Sondyqtan Five Hunter Star seriktesi Sezar Salazar, Anton Karpenko, Pavel Cherkashın, Lenta.ru kompanııasynan Alekseı Chashva syndy halyqaralyq deńgeıdegá esimder shaqyrtyldy", - dep atap ótti NATD basshysynyń orynbasary.
