Qazaqstannyń úzdik zańgerleri marapattaldy
«Ata Zańmyz óziniń ómirsheńdigin kórsetip otyr. Óıtkeni qoldanystaǵy Konstıtýtsııa tynyshtyqty, ekonomıkalyq ósýdi jáne Qazaqstanda quqyq ústemdigin qamtamasyz etip otyr. Sondyqtan Konstıtýtsııa kúni búkil Qazaqstan halqy úshin úlken mereke. Konstıtýtsııa - egemen Qazaqstannyń berik irgetasy, azattyǵymyzdyń aıshyqty aıǵaǵy, qundylyqtardy ulyqtaǵan eldigimizdiń kıeli kitabyna aınalǵan qasterli qujat. Qasym hannyń qasqa jolynan, Esim hannyń eski jolynan, áz Táýkeniń «Jeti jarǵysynan» bastaý alyp, jalpy demokratııalyq prıntsıpterge negizdelgen Ata Zańymyzǵa bıyl 23 jyl tolyp otyr. Sizderdi alda kele jatqan Qazaqstan Respýblıkasy Konstıtýtsııasy kúnimen quttyqtaımyn», - dedi QR Konstıtýtsııalyq Keńesiniń tóraǵasy Qaırat Mámı.
Aıta keteıik, baıqaý joǵary bilikti zańgerlerdiń qoǵamnyń jáne memlekettiń aldyndaǵy eńbegin moıyndaý, Qazaqstannyń quqyqtyq saladaǵy bedeldi mamandarynyń pýlyn qalyptastyrý maqsatynda uıymdastyryldy.
Baıqaýǵa jalpy 106 ótinim kelip túsken. Qatysýshylardy irikteýdi QR Tuńǵysh Prezıdenti - Elbasy qory atqarýshy dırektorynyń orynbasary Igor Rogovtyń tóraǵalyǵymen qazylar alqasy júzege asyrdy.
Ótinim bergenderdiń arasynda sottar men prokýratýralardyń ókilderi, kvazımemlekettik sektordyń qyzmetkerleri, ortalyq atqarýshy organdar qurylymdarynyń mamandary, ishki ister bólimderiniń qyzmetkerleri, sot sarapshylary, advokattar men JOO-lardyń oqytýshy quramy ókilderi bar.
Sonymen, «Zań shyǵarýshylyq qyzmetine qatysý» atalymynda birinshi oryndy Sáýle Mektepbaeva ıelendi. «Zań ǵylymdaryna qosqan úlesi úshin» atalymy boıynsha Mýslım Hasenov úzdik dep tanylsa, «Quqyqtyq bilim berý jáne aǵartýshylyq» atalymynda Mıras Daýlenov birinshi orynǵa laıyqty boldy.
Barlyq atalymdar boıynsha birinshi orynnyń ıegerlerine «Úzdik jas zańger-2018» ataǵy berilip, 1 mıllıon teńge somasynda aqshalaı syıaqy tapsyryldy.
