Qazaqstannyń úzdik vaıneri anyqtaldy

Festıval aıasynda qazaqstandyq estrada juldyzdarynyń qatysýymen kontsert ótti jáne elimizdiń eń úzdik vaıneri anyqtaldy. Onlaın-daýys berý nátıjesinde "Úzdik vaıner" atalymyn jáne 350 myń teńge júldeni «_aitkarimov» jeńip aldy. Ekinshi oryn jáne 250 myń teńgeniń sertıfıkaty «Dd331» komandasyna berildi. Sáıkesinshe, úshinshi oryn men 150 myń teńge júldeaqyny «al_farabi.bizhanov» nıkindegi vaıner ıelendi.
 

Atap ótken jón, uıymdastyrýshylar jeńimpazdardyń esimin bilgen joq, olardy kórermender onlaın-daýys berý jolymen anyqtady.

Astana ákimdigi qoǵamdyq damý isteri basqarmasy jastarmen jumys bóliminiń basshysy Baqytjan Júnisbekov vaınerler men sketch túsiretinderdi shatastyrmaý qajettigin aıtty.

«Ekeýi eki bólek dúnıe. Qazaqstannyń úzdik vaınerleriniń mıllıonnan astam oqyrmany bar. Kez kelgen BAQ mundaı aýdıtorııasymen maqtana almaıdy. Ótken jylǵy festıvalge Nurlan Batyrov, Tı Djekrs syndy úzdik vaınerler qatysqan bolatyn. Bıyl olar ádilqazy alqasynyń quramyna kirip, jas vaınerlerge baǵa berdi", - dep atap ótti ol.
 

Onyń aıtýynsha, qatysýshylarǵa rolık túsirý úshin "Astananyń 20 jyldyǵy", "Jastar saıasaty" jáne "Jastar degen kim" taqyryptary berildi. Hronometraj 1 mınýttan aspaýy tıis. Vaınerler vıdeony 2 kúnde túsirýi tıis edi. Baıqaýǵa túsken tolassyz ótinimderden 15 úzdik beınerolık fınalǵa irikteldi.

«Baıqaýdyń formaty "Daýys" shoýyna uqsaıdy. Tájirıbeli vaınerler qazylar alqasyna shaqyryldy jáne árqaısysy óz komandasyn jasaqtap, úmitkerlerge baǵyt berip otyrdy. Barlyq qatysýshylarǵa yntalandyrý syılyqtary berildi. Jeńimpazdarǵa 350 myń, 250 myń jáne 150 myń teńgeniń sertıfıkattary tabystaldy", - dep óz sózin tolyqtyrdy spıker. 
 

Sonymen birge bólim basshysy ótken jylǵy qatysýshylardyń "Qasıetti Qazaqstan" baǵyty boıynsha túrli beınerolıkter túsirgenin eske saldy.

«Olardyń Astana, Taraz qalalary týraly patrıottyq beınerolıkterin qazir túrli sharalarda jastarǵa kórsetip júrmiz", - deıdi B. Júnisbekov.