Qazaqstannyń úzdik trıatlonshylary anyqtaldy
NUR-SULTAN. QazAqparat - Túrkistan oblysy Kentaý qalasyndaǵy Qoshqorǵan sý qoımasynyń jaǵalaýynda trıatlonnan Qazaqstan Respýblıkasy Kýboginiń birinshi kezeńi ótkizildi, dep habarlaıdy QazAqparat.
QR MSM Sport jáne dene shynyqtyrý komıtetinen habarlanǵandaı, Nur-Sultan, Almaty jáne Shymkent, sonymen qatar, Aqmola, Almaty jáne Túrkistan oblystarynan kelgen 56 kásibı sportshy osy jarysta baq synasqan.
«Túrkistan oblysynda tuńǵysh ret ótkizilýine oraı bul saıys tarıhı bolyp ataldy. Aýa raıy mundaı áserli jarystyń ótkizilýine qolaıly boldy. Kún saıyskerlerdi 18 gradýs jylýlyǵymen qýantty», - delingen komıtet habarlamasynda.
Elite sanatyndaǵy «sprınt» saıysy básekege toly bolǵan.
«Munda astanamyzdan kelgen ulttyq qurama komanda múshesi Daryn Qonysbaev myqty bolyp, 59 mınýt 17 sekýndta márege birinshi jetti. Oǵan 9 sekýnd utylǵan almatylyq Anýar Týrýbaev kúmis júldeger atandy. Úzdik úshtikti 1 saǵat 1 mınýt 5 sekýnd nátıje kórsetken taǵy bir almatylyq sportshy Abzal Orynbek tuıyqtady. Áıelder arasynda atalmysh sanatta úzdik nátıje (1 saǵat 6 mınýt 16 sekýnd) kórsetken Nur-Sultan qalasynyń ókili, ulttyq qurama komanda múshesi Arına Shýlgına boldy. 1 mınýt 1 sekýnd jeńilgen Aqmola oblysynyń týmasy Ashraf Kamalova ekinshi orynǵa ıelik etti. 1 saǵat 8 mınýt 22 sekýnd nátıjesi úshin Almaty qalasynyń sportshysy Ǵazıza Kýmakbaeva qola medalmen marapattaldy», - delingen habarlamada.
Elite sanatynyń taǵy bir top sportshylary «sýper-sprınt» (300 m júzý, 8 km velojarys jáne 2 km júgirý) qashyqtyǵyndaǵy myqtyny anyqtaǵan. Sportshylar ózara 30 sekýnd aıyrmashylyqpen jarys bastap, qurmet tórine úzdik nátıje kórsetkenderi shyqty. Erler arasynda birinshi oryndy ulttyq qurama komanda múshesi shymkenttik Danııl Zýbtsov ıelengen. Onyń ýaqyty - 24 mınýt 38 sekýnd. Márege jerlesinen 1 mınýt 3 sekýnd keıin kelgen Álıhan Abýseıt qortynydy hattamada ekinshi orynǵa ornyqqan.
«25 mınýt 48 sekýnd ýaqytymen Nıkıta Kýrganskıı (Aqmola oblysy) úshinshi orynnan kórindi. Al qyzdar arasynda kóksheniń qyzdary qurmet tuǵyryn túgelimen jaýlap aldy. 28 mınýt 37 sekýnd ýaqyt kórsetken Natalıa Korotkova altyn alsa, oǵan 8 sekýnd jeńilgen ıAna Zımnıtskaıa kúmis aldy. Júldegerler úshtigin 28 mınýt 58 sekýnd nátıje kórsetken Nadejda Bekmaganbetova tuıyqtady», - dep habarlaıdy komıtetten.
Barlyq sanattaǵy sportshylardyń nátıjelerimen www.triathlon.org.kz saıtynda tanysýǵa bolady.
