Qazaqstannyń úzdik tennıs bapkerleri marapattaldy
ASTANA. QazAqparat – Qazaqstannyń 2022 jylǵy úzdik tennıs bapkerleri marapattaldy, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, jeńimpazdar ǵana emes, arnaıy atalymdarǵa ıe bolǵandar da atalyp ótildi.
10 jáne odan kishiler sanaty boıynsha úzdik bapker – Andreı Van (Smash tennıs ortalyǵy, Óskemen).
12 jáne odan kishiler sanaty boıynsha – Amal Sultanbekov (Gorky Tennis Park, Almaty).
14 jáne odan kishiler sanaty boıynsha – Muhamadamın Ermatov (Beeline Arena, Astana).
18 jáne odan kishiler sanaty boıynsha – «Qazaqmys» tennıs klýby (Almaty).
Vıacheslav Sokolovskıı («Eıs» tennıs ortalyǵy, Almaty) men Ótkir Abdýllaev («Eıs», Aqtóbe) 2022 jyldyń úzdik aǵa bapkeri atandy.
Sondaı-aq Team Kazakhstan akademııasynyń bapkeri Sergeı Kvak alǵyshatpen jáne eskertkish syılyqpen marapattaldy. Onyń basshylyǵymen 14 jasqa deıingi jasóspirimder quramasy alǵash ret álem chempıonatynyń úzdik tórttigine kirdi.
Arbadaǵy paralımpıalyq tennısten Jasulan Alnııazov jyl bapkeri bolsa, osy sport túriniń damýyna úles qosqan Erjan Isaqov pen Nabıjon ıAkobovıch umyt qalmady.
Bıyldan bastap Qazaqstan tennıs federatsııasy elimizde arbadaǵy jáne adaptıvtik tennısti keńinen taratyp, damytýdy qolǵa aldy. Almaty qalasynda qyrkúıek aıynda paralımpıalyq tennısten alǵash ret el chempıonaty ótti. Demeýshiler esebinen osy birinshiliktiń jeńimpaz-júldegerleri aldaǵy jyl boıy 200 myń, 150 myń jáne 100 myń teńge kóleminde stıpendııa alatyn boldy.
Eske sala keteıik, budan buryn ústel tennısinen Alan Qurmanǵalıevtiń álem chempıonatynda altynǵa qosa qola medal jeńip alǵanyn jazǵan bolatynbyz.
Sondaı-aq Elena Rybakına álemdik reıtıngide TOP-20 tennısshige jýyqtady.
Foto: ktf.kz
