Qazaqstannyń úzdik sportshylaryn alǵash ret jankúıerler anyqtaıdy
ALMATY. QazAqparat - Qazaqstanda «Jyldyń ulttyq sport júldesi» baıqaýy boıynsha daýys berý sharasy bastaldy, endi jankúıerler eń myqty sportshyny ózderi anyqtaıdy, dep habarlaıdy QazAqparat tilshisi.
Baıqaý Qazaqstan Respýblıkasy Ulttyq Olımpıadalyq komıtetiniń prezıdenti Tımýr Qulybaevtyń bastamasymen osymen úshinshi ret ótkizilip otyr. Daýys berý QR UOK-nyń www.olympic.kz resmı saıtynda 28 qarashaǵa deıin jalǵasady. Baıqaý qorytyndysy 30 qarashada saltanatty túrde shyǵarylmaq.
Naqtyraq aıtqanda, úzdik sportshylardy anyqtaý jankúıerlerge 9 atalym boıynsha tapsyrylyp otyr.
«2017 jyldyń sport kúntizbesi jańalyqqa toly. Bizdiń sportshylarymyz qatysatyn halyqaralyq saıystar bıyl óte kóp. Ulttyq sport júldesin anyqtaýda jankúıerlerdi belsendi bolýǵa shaqyramyz», - dedi Ulttyq olımpıada komıtetiniń bas hatshysy Danııar Ábilǵazın.
Ár atalymǵa 3-6 úmitkerden usynylǵan. Úmitkerler arasynda Olımpıada chempıony Olga Rypakova, veloshabandoz Alekseı Lýtsenko, Ýnıversıada jeńimpazy frıstaıl-mogýlshy ıÝlııa Galysheva, sondaı-aq short-trek, bıatlon, boks, taekvondo syndy birqatar sport túrinen qurama komandalardyń bas jattyqtyrýshylary bar. Sonymen qatar, jankúıerler úzdik Dene shynyqtyrý jáne sport basqarmalary men jyldyń úzdik komandasyn anyqtaıtyn bolady.
«Buǵan deıin Ulttyq sport júldesin arnaıy komıssııa anyqtasa, bıyl jankúıerler tańdaıdy. Sondyqtan, bıylǵy Ulttyq sport júldesi jańa formatta, televızııa formatynda kórermen qoldaýymen ótkizilgeli otyr», - deıdi Danııar Ábilǵazın.
