Qazaqstannyń úzdik shahmatshylaryna «KazChess Award» júldesi tabystaldy
Toǵyz nomınatsııa boıynsha arnaıy syılyqtardy Qazaqstan shahmat federatsııasynyń prezıdenti, Freedom Holding Corp bas atqarýshy dırektory Tımýr Týrlov elimizdiń shahmat qaýymdastyǵynyń úzdik ókilderine tabys etti. Bul Qazaqstan shahmat federatsııasy bekitken alǵashqy jyl saıynǵy marapat.
«Ótken maýsym boıy bizdiń sportshylar jarystarda tamasha nátıje kórsetti. Ár jeńistiń artynda ata-analar, jattyqtyrýshylar shtaby jáne árıne, sportshylardyń ózderi jasaǵan aýqymdy jumys tur. Sondyqtan biz bul marapatty shahmat qaýymdastyǵynyń úzdik ókilderiniń eńbegin moıyndaý úshin bastama etip kóterdik. Bizde óz jetistikterimen Qazaqstandy álemdik arenada tanytatyn, biraq odan da mańyzdysy – óskeleń urpaq shahmatpen aınalysýǵa jáne odan da zor jeńisterge jetýge yntalandyrýǵa jarqyn úlgi bolatyn myqty sportshylar bar. Bul júlde – elimizdegi shahmatty damytý men qoldaý jónindegi úlken jáne keshendi jumystyń bir bóligi, sonyń arqasynda biz kórnekti sportshylardyń birneshe býynyn ósire alamyz», - dedi Tımýr Týrlov.
Osylaısha, 2022 jyldyń qorytyndysy boıynsha myna sportshylar «KazChess Awards» laýreaty atandy:
- «Áıelder arasyndaǵy jyl sportshysy» - Bıbisara Asaýbaeva, áıelder arasyndaǵy jyldam shahmattan eki dúrkin álem chempıony;
– «Erler arasyndaǵy jyl sportshysy» - Rınat Jumabaev, blıts boıynsha erler arasyndaǵy Azııa chempıony;
- «Jyl kóshbasshysy» - Jansaıa Ábdimálik, 44-shi Halyqaralyq shahmat olımpıadasynyń qola júldegeri;
– «Jyl serpilisi» - Dınara Sádýaqasova, áıelder arasyndaǵy jyldam shahmattan álem vıtse-chempıony;
– «Jyl jańalyǵy» - Nógerbek Qazybek, 18 jasqa deıingi jyldam shahmattan álem chempıony;
– «Jyl úmiti» - Zarına Nurǵalıeva, 14 jasqa deıingi qyzdar arasynda álem chempıony;
– «Jyl uıymdastyrýshysy» - Saıat Egemberdıev, Almaty jáne Jetisý oblystarynyń shahmat jáne ústel oıyndary federatsııasynyń prezıdenti;
- «Jyl bapkeri» - Erjan Shákenov, QR eńbek sińirgen jattyqtyrýshysy jáne álem, Azııa jáne QR chempıonattarynyń chempıondary men júldegerleriniń tálimgeri;
- «Jyl sýdıasy» - Oleg Rınas, halyqaralyq deńgeıdegi sýdıa.
Marapat ıegerleriniń biri 18 jastaǵy Nógerbek Qazybek óz áserimen bólisti: «Bul syılyqty alamyn dep kútken joqpyn, ótken aptada ǵana syılyq jóninde habar keldi. Men úshin bul úlken mártebe. Jalpy, ótken jyl ózim úshin sátti boldy: 18 jasqa deıin rapıd pen blıts boıynsha eki dúrkin álem chempıony atandym, klassıkalyq shahmattan QR chempıonatynda ekinshi oryn aldym, Úndistandaǵy olımpıadada erler arasynda Qazaqstan quramasynda oınadym. Endi grossmeıster bolǵym keledi, biraq oǵan kóp kúsh salý kerek. Bul nátıjege ata-anam men jattyqtyrýshylardyń, Tımýr Rýslanovıchtiń qoldaýymen qol jetkize alamyn dep úmittenemin. Eger bári jaqsy bolsa, bıylǵy jyl óte nátıjeli bolatynyna senimdimin. Qazir federatsııa túrli elderden tájirıbeli jattyqtyrýshylardy tartqysy keledi, osyndaı mamandarmen jattyǵyp, odan da kúshti bolamyz dep úmittenemiz. Qazaqstandyq shahmatshylardyń bolashaǵy zor ekenine senemin jáne bizdiń qurama bolashaqta eń myqty komandalardyń biri bolady», – dedi ol.
Óz sózinde Tımýr Týrlov Qazaqstanda shahmattyń qarqyndy damyp kele jatqanyn atap ótti.
«Elimizde shahmatqa úlken qyzyǵýshylyq bar ekenin jáne búkil el maqtana alatyn naǵyz chempıondar bar ekenin maqtan tutamyz. Olar álemdik arenada keremet nátıjeler kórsetip júr. Qazaqstannyń shahmatty buqaralyq sport túri retinde damytatyn úlken keleshegi bar. Rapıd pen blıts boıynsha álem chempıonatyn ótkizýde alǵan uıymdastyrýshylyq tájirıbemiz elimizde jáne álemdik qoǵamdastyqta shahmattyń damýyna kóbirek nazar aýdartatynyna senemiz», - dedi spıker.
QShF basshysy ótken jyly qazaqstandyq shahmatshylardyń tabysty nátıje kórsetýiniń arqasynda Qazaqstannyń osy sport túrin damytýǵa baǵyttalǵan jańa jobalardy iske asyrýǵa úlken múmkindigi bar ekenin aıtty. Onyń aıtýynsha, federatsııa kóptegen talanttardy ashý úshin ári qaraı jumys isteıdi, ár túrli jastaǵy sportshylar arasynda kóptegen jarystar ótkizedi.
«Shyn máninde talantty jastarymyzǵa qarap tańdanamyn jáne osy talabyn odan ári damytý úshin bárin jasaýǵa tyrysamyn», - deıdi Tımýr Týrlov.
Ol sondaı-aq Astanada 7 sáýir men 1 mamyr aralyǵynda ótetin shahmattan FIDE álem chempıonatynyń mańyzdylyǵyn atap ótti. Tımýr Týrlov elorda ótetin planetanyń eń myqty shahmatshylarynyń jekpe-jegi bizdiń elimizde sporttyń osy túrin dáripteıtinine senim bildirdi.
Ulttyq shahmat federatsııasy bıyl birqatar naqty bastamalardy josparlap otyr: shahmat sektsııalarynyń sanyn eki esege – 14 myńǵa deıin ulǵaıtý, mektepke deıingi jarystar, balalar kýboktary, sondaı-aq mektep, ýnıversıtet jáne tipti korporatıvtik lıgalar ótkizý, sapaly ınfraqurylymdy damytý, QShF keńselerin, Astana men Almatyda zamanaýı shahmat mektepterin ashý.