Qazaqstannyń úzdik otbasy onlaın-daýys berý arqyly anyqtalady
ASTANA. QazAqparat - 2 qyrkúıekte Qazaqstanda «Mereıli otbasy» baıqaýy aıasynda respýblıkanyń úzdik otbasyn anyqtaý maqsatynda Internet arqyly daýys berý bastalady.
Bul týraly búgin QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komısssııasy tóraǵasynyń orynbasary Lıazzat Súleımen málim etti.
Ol óz sózinde «Mereıli otbasy» baıqaýy elimizdiń barlyq óńirlerinde sáýir aıynda bastalǵanyn eske salyp ótti. Qatysýshylardy irikteý Qazaqstannyń árbir óńirinde jáne Astana men Almaty qalalarynda aralyq týrlar barysynda anyqtalady. Kórermenderdiń basym bóligi daýys bergen otbasy «Mereıli otbasy» laýreaty atanyp, arnaıy dıplommen jáne baǵaly syılyqtarmen marapattalady.
«2 qyrkúıekten bastap 8 qyrkúıek kúni saǵat 27-00-ge deıin ınternet arqyly daýys berý júrgiziledi. 16 óńirden ókildik etken otbasylar arasynan jeńimpazdy halyq ózi tańdap alady», - dedi L.Súleımen.
Onyń sózine qaraǵanda, bul joly konkýrsqa 19 etnos pen 53 ınternatsıonaldy otbasy qatysýda. Barlyq otbasylardyń 40 paıyzdan astamy kóp balaly.
«2015 jylmen salystyrǵanda aǵymdaǵy jyly eń dınastıtsııa ókilderi sanalatyn otbasylar 32 paıyzǵa artyp otyr. Al jas otbasylar sany bolsa 35 paıyzǵa kóp. Al bul «Mereıli otbasy» baıqaýyna qatysatyn otbasylardyń qatary kóbeıip kele jatqandyǵyn bildiredi», - dedi ol.
L.Súleımen derekterine qaraǵanda, bıyl bul baıqaýǵa 2579 otbasy qatysyp, tek olardyń 16-sy ǵana aqtyq synǵa joldama alyp otyr.
Aıta keterligi, baıqaýǵa 2014 jyly 1298, 2015 jyly 2285 otbasy qatysqan bolatyn.
