Qazaqstannyń úzdik muǵalimderiniń ulttyq lıgasy qurylady
ASTANA. 31 mamyr. QazAqparat - Elbasy Nursultan Nazarbaev bilim berýdegi qazirgi zamanǵy ádisterdi jáne tehnologııalardy jetildirýdiń qajettigine, pedagogıkalyq sheberlikti jetildirýge, jańashyl muǵalimderdiń tájirıbelerin keń taratýǵa, sol arqyly bilim berýdiń sapasyn arttyrýǵa basa kóńil bólýde.
Sońǵy jyldary muǵalim mártebesi de eń ózekti máseleniń birine aınalyp otyr. Osy maqsatta memleket tarapynan naqty jáne aýqymdy sharalar iske asyrylýda. Máselen, 2011 jyldyń 1 shildesinen bastap oqytýshylardyń jalaqylary 30 paıyzǵa kóbeıse, 2012 jyldyń birinshi qyrkúıeginen bastap, jalaqyǵa qosymsha taǵy aqy tólene bastady. Atap aıtqanda, joǵary kategorııalary barlarǵa 100 paıyz kóleminde ústemeaqy, ekinshi biliktilik kategorııasy úshin 70 paıyz, úshinshi 30 paıyzǵa deıin artty. Ustazdar qaýymynyń sapasyn arttyrý úshin muǵalimderdiń biliktiligin arttyrý - jańa sapalyq deńgeıge kóshkenin atap ótken jón. Eki jyl buryn ustazdar biliktiligin arttyrý Kembrıdj modeline kóshkenin jáne osy júıe boıynsha 8 myńǵa jýyq el ustazy biliktiligin arttyrǵanyn jetistik dep baǵalaýǵa bolady. 2011 jyldyń qarashasynda «Nazarbaev Zııatkerlik mektepteri» derbes bilim berý ortalyǵy janynan qurylǵan Pedagogıkalyq sheberlik ortalyǵy da - oqytýshy qaýymynyń sapasyn kóterýge mol kómegi tıdi. Bilim jáne ǵylym mınıstri Baqytjan Jumaǵulov Parlamenttegi Úkimettik saǵatynda málim etkendeı, Biliktilikti arttyrýdyń jańa júıesi áli de jalǵasyn tabady. Aldaǵy ýaqytta Qazaqstannyń eń úzdik muǵalimderiniń ulttyq lıgasy da qurylmaqshy, olardyń 48-i jyl saıyn 1000 aılyq esepteý kórsetkishi kólemindegi 10 myń dollar bolatyn stıpendııa alyp otyrmaq. Sóz joq, osynyń bári pedagogtyń mártebesin kóterýdegi eleýli qadamdar bolady.
