Qazaqstannyń úzdik medıtsına qyzmetkerleri marapattaldy

ASTANA. QazAqparat - Dúnıejúzilik medbıkeler kúni aıasynda Qazaqstan medıtsınasynyń úzdik qyzmetkerleri marapattaldy. Bul jaıynda QR Densaýlyq saqtaý mınıstrliginen málim etti, dep habarlaıdy QazAqparat.

Elordadaǵy Ulttyq ǵylymı kardıohırýrgııa ortalyǵynda ótken shara barysynda elimizdiń úzdik medıtsına qyzmetkerleri QR densaýlyq saqtaý mınıstrliginiń «Densaýlyq saqtaý isiniń úzdigi» tós belgisimen, qurmet gramotalarymen jáne «Úzdik aýyldyq medıtsına qyzmetkeri», «Úzdik BMSK meıirbıkesi», «Úzdik mamandandyrylǵan meıirbıke», «Meıirbıke isiniń úzdik menedjeri», «Medıtsınalyq kolledjdiń úzdik oqytýshysy» atalymdary boıynsha alǵys hattar men marapatqa ıe boldy.  

Shara barysynda Densaýlyq saqtaý vıtse-mınıstri Lázzat Aqtaeva qazir Qazaqstannyń densaýlyq saqtaý salasynda 170 myńnan astam orta medıtsınalyq qyzmetker eńbek etetindigine nazar aýdartty. Sońǵy 10 jylda elimizdiń orta medıtsınalyq qyzmetkerlermen qamtamasyz etilýi 10 myń adamǵa shaqqanda 2005 jylǵy 78,6-dan 96-ǵa (2016 jyly) ósti.

Vıtse-mınıstr meıirger isi qyzmetiniń damý úrdisi qazirgi zamanǵy densaýlyq saqtaý júıesinde olardyń rólin aıtarlyqtaı kúsheıtkenine, meıirgerler kómekshi retinde emes, dárigerdiń teń quqyly, derbes meıirbıkelik sheshimdi qabyldaıtyn, josparlaıtyn jáne dáleldi kútimdi júzege asyratyn seriktesi bolyp tabylatynyn atap ótti.

«Eýropalyq dırektıvalarǵa sáıkes, bilim berýdiń barlyq deńgeıinde medbıkelik isti damytýǵa baǵyttalǵan respýblıkada qabyldanǵan «Densaýlyq» memlekettik baǵdarlamasy, Meıirbıke isin  damytýdyń keshendi jospary, «Medıtsınalyq bilim berýdi jańǵyrtý» jol kartasy jobasy syndy baǵdarlamalyq qujattar  onyń dáleli bola alady»,  dedi ol.