Qazaqstannyń úzdik kúzetshileri anyqtaldy
QOSTANAI. QazAqparat – Elimizde «Jyldyń úzdik jeke kúzet uıymy» respýblıkalyq baıqaýy ótti, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Kúzet qyzmetteriniń sapasyn QR ІІM, «Atameken» ulttyq kásipkerler palatasy, QR kúzet uıymdarynyń qaýymdastyǵy ókilderi engen komıssııa baǵalady. Baıqaý qorytyndysy boıynsha qostanaılyq ujym «2019 jylǵy úzdik jeke kúzet uıymy» atandy.
«QR Úkimetiniń 2017 jylǵy 31 qazandaǵy qaýlysymen 29 qazan kúzet uıymdarynyń merekesi bolyp bekitildi. Kúzetshiler ózderine úlken jaýapkershilikti arqalaǵan, qoǵamnyń naǵyz saqshylaryna aınaldy. Eńbegi el kóleminde baǵalanǵan «Tsentr Bezopasnostı KZ» JShS ujymynyń jetistikteri qýantady. Jalpy, Qostanaı oblysynyń aýmaǵynda 200 kúzet uıymy tirkelgen. Polıtsııa qyzmetkerleri kúzet qurylymdarynyń basshylarymen birge múlikterdi saqtaýdyń jańa ádisterin únemi engizip keledi. «Tsıfrlyq Qazaqstan» baǵdarlamasyn júzege asyrý aıasynda kúzet uıymdary mobıldi qosymshalar arqyly zamanaýı qyzmet kórsetýge kóshýde», - deıdi Qostanaı oblysy PD kúzet qyzmetin baqylaý bóliminiń bastyǵy Nurmuhamed Seıitjanov.
Polıtseıler óńir turǵyndaryna óz páterleri men úılerin jeke kúzet uıymdaryna kúzetýge tapsyrý arqyly óz múlkin qorǵaýdy usynady. Kúzet qurylymdarynyń qyzmetterin Rýdnyı, Arqalyq, Lısakov, Jitiqara, Qostanaı, Áýlıekól, Qarabalyq jáne Meńdiqara aýdandarynda paıdalanýda.
«Osy salada kóp jyl eńbek etip kelemin. Basynda qıynshylyqtar boldy. Degenmen, ishki ister organdarynda istegen tájirıbemniń arqasynda isim alǵa basty. Bul jeńis biz úshin mańyzdy», - deıdi «Tsentr Bezopasnostı KZ» dırektory Lıýdmıla Vasılevna.
