Qazaqstannyń úzdik konkıshileri Astananyń muz aıdynynda óner kórsetýde
ASTANA. 28 naýryz. QazAqparat - Astanada Qazaqstan Respýblıkasynyń ІІІ qysqy Spartakıadasy aıasynda konkımen jarysý sporty bastaý aldy.
«Alaý» muz aıdyny saraıynda ótip jatqan jarysqa elimizdiń úzdik konkıshileri qatysýda. Sportshylar respýblıkanyń 8 aımaǵynan keldi.
astana.kz saıtynyń jazýynsha, olardyń arasynda Astanaǵa jaqynda ǵana kelgen álem chempıony Denıs Kýzın bar. Ol Sochıde 1000 metr qashyqtyqqa júgirýden jeńimpaz atanyp, elimizdiń Ánuranyn áýeletken bolatyn. Endi ol respýblıkalyq jarysta týǵan jeri - Qostanaı oblysynyń namysyn qorǵaıdy. D.Kýzın birinshi kúni-aq 1500 m qashyqtyqqa júgirýden Spartakıada chempıony atandy.
Muz ústindegi báseke 10.00-den 15.00-ge deıin ótip, 30 naýryzǵa deıin jalǵasady. 31 naýryzda «Alaý» muz aıdyny saraıynda marafon ótedi.
QR ІІІ qysqy Spartakıadasynda sporttyń 18 túrinen baq synalady. Ol bıylǵy jyldyń aqpan aıynda Qaraǵandy qalasynda shaıbaly hokkeıden bastalǵan bolatyn. Endi Óskemen qalasynda 4 sáýirde frıstaıl jarysymen aıaqtalady.
