Qazaqstannyń úzdik geologtary marapattaldy
NUR-SULTAN. QazAqparat - Búgin elordada Geolog kúnine oraı saltanatty is-shara ótip, salanyń úzdik mamandary marapattaldy, dep habarlaıdy QazAqparat tilshisi.
QR Indýstrııa jáne ınfraqurylymdyq damý vıtse-mınıstri Tımýr Toqtabaev álemde shıkizat resýrstaryn tutyný men óndirýdiń qarqyndy ósýi jaǵdaıynda geologııadaǵy damytý men jańǵyrtý máseleleriniń ózektiligi artyp otyrǵannyn atap ótti.
Investıtsııalyq ahýaldy jaqsartý maqsatynda eń úzdik álemdik tájirıbege negizdelgen «Jer qoınaýy jáne jer qoınaýyn paıdalaný týraly» Kodeks bekitilip, jer qoınaýyn paıdalanýdyń ınvestıtsııalyq tartymdylyǵy boıynsha Freızer ınstıtýtynyń álemdik reıtıngisinde Qazaqstan 49 pozıtsııaǵa, ıaǵnı 104 eldiń ishinde 73-orynnan 24-orynǵa kóterildi.
Saltanatty jıyn barysynda ataqty geolog-ǵalym Qanysh Sátbaevtyń ǵylymǵa qosqan jáne salany damytýdaǵy orasan zor eńbegi týraly atap ótildi. Aıta keteıik, bıyl el aýmaǵynda Qanysh Imantaıulynyń 120 jyldyǵyna oraı halyqaralyq konferentsııalar uıymdastyrylyp jatyr.
Atap aıtqanda, óndiris ozattary «Qazaqstan Respýblıkasy jer qoınaýynyń qurmetti barlaýshysy», «Qazaqstan Respýblıkasy jer qoınaýyn barlaýdyń úzdigi» ataqtaryna, vedomstvolyq marapattarǵa, alǵys hattarǵa, sondaı-aq gramotalarǵa ıe boldy.
Sonymen, búgin «Qazaqstan Respýblıkasynyń qurmetti jer qoınaýyn barlaýshy» ataǵymen «E&P PetroConsulting» JShS bas dırektory J. Arıstambaev, «Qazatomónerkásip» AQ Taý-ken departamentiniń dırektory V. Barmasov, «Qazgeologııa» AQ I sanatty gıdrogeology Ǵ. Jarmuhambetova, «NovaTsınk» JShS bas geology A. Júsipov marapattaldy.
Budan bólek, «Qazaqstan Respýblıkasy Jer qoınaýyn barlaýdyń úzdigi» tós belgisi Q. Sátbaev atyndaǵy Geologııa jáne jer qoınaýyn paıdalaný ınstıtýty kafedrasynyń meńgerýshisi A. Bekbotaevaǵa, «Qazgeologııa» AQ jetekshi geology A. Hamzınge tabystaldy.
