Qazaqstannyń úzdik dzıýdoshylary «Masters» týrnırine qatysady
ASTANA. QazAqparat - 15-16 jeltoqsan kúnderi Gýanchjoýda (QHR) dzıýdodan jyldyń eń sońǵy jarysy álemdik «Masters» týrnıri ótedi, dep habarlaıdy QazAqparat tilshisi.
QR Dzıýdo federatsııasynyń baspasóz qyzmeti málim etkendeı, Halyqaralyq dzıýdo federatsııasynyń kúntizbesinde «Masters» týrnıri mańyzdylyǵy jaǵynan Olımpıada oıyndary men álem chempıonatynan keıingi orynda tur.
Sebebi, munda álem reıtınginde kósh bastaǵan úzdik 16 dzıýdoshy ǵana qatystyrylady. Tıisinshe, atalmysh jarysta beriletin upaı sandary da qomaqty. Jeńimpazdarǵa 1800 upaı, ekinshi oryn alǵan dzıýdoshyǵa 1260 upaı, úshinshi orynǵa ıe bolǵan dzıýdoshyǵa álem reıtınginde 900 upaıdan qosylady.
Jarys erejesine saı álem reıtınginde úzdik 16 sportshy qataryna Qazaqstan ulttyq quramasynan 7 dzıýdoshy enip, «Masters» týrnırine qatysýǵa múmkindik aldy.
Aıta keterligi, Qazaqstan áıelder quramasynan dzıýdoshylar bul jarysta kúrespeıdi.
Nazarlaryńyzǵa jarysqa qatysatyn sportshylar men olardyń álem reıtingindegi oryndaryn usynamyz.
60 kg
Ǵusman Qyrǵyzbaev - 7 oryn (3881 upaı)
Eldos Smetov - 13 (2765)
66 kg
Erlan Serikjanov - 10 (3200)
Eldos Jumaqanov - 11 (3067)
73 kg
Jansaı Smaǵulov - 10 (3044)
81 kg
Dıdar Hamza - 15 (2446)
90 kg
Islam Bozbaev - 15 (2718).
