Qazaqstannyń úzdik 48 ustazynyń árqaısysyna 1,7 mln. teńgeden syıaqy tapsyryldy
ASTANA. 3 qazan. QazAqparat - Búgin elordadaǵy «Shabyt» shyǵarmashylyq saraıynda Qazaqstannyń úzdik ustazdaryn marapattaý rásimi júrip jatyr.
Atap aıtqanda, Astanaǵa Qazaqstannyń ár oblystarynan 48 pedagog keldi. Olar ózderiniń biliktiligimen baıqaýdyń alǵashqy kezeńine qatysqan 5 myńnan astam áriptesteriniń aldyna shyǵyp, baıqaý nátıjesi boıynsha «Úzdik ustaz» ataǵyna ıe boldy. Olardyń ishinde 32 oqytýshy - mektepke deıingi jáne orta bilim júıesinde, al qalǵan 16-sy - tehnıkalyq, sondaı-aq kásibı bilim berý salasynyń ustazdary.
Úzdik muǵalimderge QR Bilim jáne ǵylym mınıstrligi 1000 aılyq eseptik kórsetkish kóleminde (1 mln. 731 myń teńge) syıaqy tapsyrdy. Osy saltanatty shara barysynda ustazdardy atalǵan vedomstvonyń basshysy Aslan Sárinjipov quttyqtady.
Osy baıqaý ekinshi jyl qatarynan ótkizilip otyr. Bul shara pedagog mamandyǵynyń róli men bedelin arttyrýǵa, mektepke jas mamandardy tartýǵa negizdelgen.
