Qazaqstannyń «úzdik 100 mektebi» reıtıngisine 2011 jyly Astananyń birde-bir mektebi enbeı qaldy - vıtse-mınıstr
TANA. 23 tamyz. QazAqparat /Gúlmıra Alıakparova/ - Búgin Astanada ótken bilim salasy qyzmetkerleriniń tamyz keńesinde QR Bilim jáne ǵylym vıtse-mınıstri Serik Yrsalıev, elorda mektepteriniń túlekteri Ulttyq biryńǵaı testileýdi jaqsy tapsyratyndyǵyn, biraq bıyl astananyń birde-bir mektebi Qazaqstannyń «úzdik 100 mektebi» reıtıngisine enbeı qalǵandyǵyn málim etti.
Vıtse-mınıstrdiń aıtýynsha, Astana qalasynda 1-6 jas aralyǵyndaǵy balalardyń 62,5 paıyzy mektepke deıingi bilimmen qamtylǵan. Ortasha respýblıkalyq kórsetkish - 43,6 paıyz.
«Bul respýblıka boıynsha eń joǵary kórsetkishterdiń biri», - deıdi ol.
Onymen birge, 14-21 jastaǵy jastardyń jalpy sanynyń 21 paıyzǵa jýyǵy tehnıkalyq jáne kásibı bilimmen qamtylǵan. Eldegi ortasha kórsetkish - 16,6 paıyz. Ortasha respýblıkalyq kórsetkishtermen alyp qaraǵanda, elorda mektepteriniń túlekteri Ulttyq biryńǵaı testileýdi jaqsy tapsyrady. Ortasha ball - 88,1, ortasha respýblıkalyq ball - 86,8. 179 túlektiń 102-si (56 paıyzy) «Altyn belgige» laıyq ekendigin dáleldedi.
UBT-dan alǵan eń joǵary baldar boıynsha jasalatyn Qazaqstannyń «úzdik 100 mektebi» reıtıngisine toqtalǵan Yrsalıev: «Úzdik 100 mekteptiń» qataryna Astana qalasynan 2009 jyly- 4, 2010 jyly - 1, al 2011 jyly birde-bir mektep ene alǵan joq», - dep atap ótti.
Onyń sózine qaraǵanda, Astanada jumys isteıtin joǵary sanatty muǵalimderdiń sany ortasha respýblıkalyq kórsetkishten joǵary. Onymen birge, astana ustazdarynyń eńbek ótili eń joǵary. Mysalǵa, eńbek ótili 20 jyldan asatyn pedagogtardyń sany respýblıka boıynsha 31,1 paıyz bolsa, elordada 40,5 paıyzdy quraıdy.
«Bul bir jaǵynan kadrlardyń turaqtylyǵyn kórsetedi, basqa jaǵynan alyp qaraǵanda Astananyń bilim berý salasyna jastardyń kelýi máselesinde suraqtar týyndatady», - dedi ol.
«Jalpy alǵanda, statıstıkalyq málimetter elorda mektepteriniń úzdik pozıtsııasyn kórsetedi», - dep túıindedi S.Yrsalıev.
