Qazaqstannyń usynysy boıynsha Reseıden Keden odaǵynyń basqa elderine taýarlar eksporttaýda qosymsha qun salyǵy boıynsha nóldik stavkamen ústeme bekitiletin bolady
ASTANA. Qyrkúıektiń 29-y. QazAqparat /Muratbek Maqulbekov/ - Qazaqstan salyqshylarynyń usynysy boıynsha Keden Odaǵynyń Komıssııasy Reseıden Keden odaǵynyń basqa elderine taýarlar eksporttaýda qosymsha qun salyǵy boıynsha nóldik stavkamen ústeme bekitý týraly sheshim qabyldady.
Bul týraly QR Qarjy mınıstrligi Salyq komıtetiniń baspasóz qyzmetinen habarlady.
Qyrkúıektiń 15-16-synda Máskeýde ótken «Janama salyqtar» sarapshylar tobynyń kezekti otyrysynda qazaqstandyq toptyń jetekshisi - Salyq komıtetiniń tóraǵasy Dáýlet Nurǵojın reseılik tasymaldaýshylardyń Keden odaǵynyń aıasynda halyqaralyq tasymaldaý jónindegi qyzmetter kórsetý jónindegi aınalymdarǵa qosymsha qun salyǵy boıynsha nóldik stavka salýy týraly máseleni kótergen bolatyn.
Іstiń mán-jaıyna keletin bolsaq, Reseı aýmaǵynan Qazaqstannyń aýmaǵyna temirjol kóligimen júk tasymaldaý jónindegi qyzmetter kórsetý kezinde, reseılik tasymaldaýshy - «Reseı temir joldary» AAQ kórsetilgen qyzmet úshin 18 paıyz kóleminde qosymsha qun salyǵy qosa eseptelgen shot-faktýrasyn beredi. Buǵan deıin, 2010 jyldyń shilde aıynyń 1-ine deıin, Reseı aýmaǵynan tys jerlerge júk tasymaldaýda salyq nól paıyzdyq ústemesi boıynsha salynyp kelgen bolatyn. Jáne ilespe qujattarǵa taýarlardyń eksporttyq kedendik rejimine jatqyzylǵanyn aıǵaqtaıtyn keden organdardyń belgisi qoıylatyn. 2010 jyly shildeniń 1-inen bastap Keden odaǵynda kedendik resimdeý júrgizilmeıtindikten, atalǵan qyzmetterge, ıaǵnı, halyqaralyq tasymaldaýlarǵa, shildeniń 1-inen bastap 18 paıyz qosymsha qun salyǵynyń stavkasy salynyp otyr.
Biraq ta, reseılik tasymaldaýshylar osyndaı qyzmetterdi úshinshi elderge kórsetý kezinde, qosymsha qun salyǵyn nól paıyz ústememen salyp otyr.
Aıta ketý kerek, salyq zańnamasynyń normalaryna sáıkes, Qazaqstanda respýblıka aýmaǵynan Keden odaǵyna múshe elderdiń aýmaqtaryna halyqaralyq tasymaldaýlar jasalǵan kezde qosymsha qun salyǵynyń nóldik ústemesi qarastyrylǵan.
Joǵaryda aıtylǵan májilistiń qorytyndysy boıynsha jáne qazaqstandyq taraptyń usynysyna sáıkes, Keden Odaǵynyń Komıssııasy qyrkúıektiń 20-synda №390 sheshimin qabyldady, oǵan sáıkes reseılik tarapqa zańnamalyq aktilerge Keden odaǵynyń aıasynda halyqaralyq tasymaldaýshylar jasaǵan kezde qosymsha qun salyǵynyń nóldik ústemesin qoldanýǵa qatysty ózgertýler engizý usynyldy.
