Qazaqstannyń Úshinshi jańǵyrýy Eýroodaq úshin geosaıası mánge ıe - Eýroparlament depýtaty
BRıÝSSELЬ. QazAqparat - Qazaqstannyń Úshinshi jańǵyrýy Eýroodaq úshin geosaıası mánge ıe.
Brıýsselde «Qazaqstannyń jańǵyrýy: EO róli qandaı?» atty taqyrypta ótken dóńgelek ústel otyrysynda Eýropa Parlamentiniń depýtaty, Eýropa Parlamentiniń shetel máseleleri jónindegi komıtetiniń múshesi Andreıs Mamykıns osyndaı pikir bildirdi, dep habarlaıdy «QazAqparat» HAA-nyń menshikti tilshisi.
Dóńgelek ústelde A. Mamykıns Qazaqstannyń Úshinshi jańǵyrýy týraly aıta kele, atalmysh baǵdarlamany «erteńgi kúnniń syn-tegeýrinderin sheshýdiń kilti» dep atady.
Spıker óziniń sózinde Qazaqstan Prezıdentiniń «Qazaqstannyń Úshinshi jańǵyrýy: jahandyq básekege qabilettilik» atty Joldaýynyń tórtinshi basymdyǵy adam kapıtalyn damytý máselesine nazar aýdardy.
«Aıta ketetin másele, jańǵyrý sharalary qoǵamnyń múddesine qyzmet etip, eshkimniń da qoǵamdaǵy úderisterden tys qalmaýyna yqpal etti. Bul rette áńgime Qazaqstannyń aýyldyq aımaqtarynda ómir súrip jatqan áıelder, balalar, qarttar men ózge de áleýmettik jaǵynan álsiz toptar týraly bolyp otyr. Eger jańǵyrtý jumystary talapqa saı júzege asyrylmasa el halqynyń ata-baba dástúri men tarıhı teńdigin joǵaltý qaýpi bar»,-dedi depýtat.
Onyń pikirinshe, jańǵyrtý úderisi Qazaqstannyń ishki sharýasy, Al Eýroodaq buǵan aldyńǵy qatarly tájirıbe arqyly qolǵabys ete alady. «Biz úshin jańǵyrtý sharalarynyń el turǵyndary arasynda keńinen kórinis tapqanyn bilý mańyzdy. Bul sharalar aýyl men qala turǵyndarynyń arasyndaǵy alshaqtyqty joıýy tıis»,-dedi A.Mamykıns.
Depýtattyń pikirinshe, 2015 jyly 21 jeltoqsanda Astanada qol qoıylǵan QR jáne EO arasyndaǵy keńeıtilgen seriktestik jáne yntymaqtastyq týraly kelisim Qazaqstannyń Eýroodaqpen yntymaqtastyqty nyǵaıtýyna serpin beredi.
«Qazaqstannyń bolashaqtaǵy jańǵyrýy EO úshin geosaıası jáne strategııalyq mánge ıe. Bir ǵasyrdan astam ýaqyt buryn, 1904 jyly Helford Makkınder Qazaqstandy «Hartlendtiń» (Jerdiń júregi-red.) bir bóligi retinde sıpattaǵan bolatyn. Qazirgi kezde Qazaqstan Ortalyq Azııanyń «Hartlendine» aınaldy ári áleýetin arttyrý múmkindigine ıe», - deıdi EP depýtaty.
Aıta keteıik, «Qazaqstannyń jańǵyrýy: EO róli qandaı?» taqyrybyndaǵy dóńgelek ústeldi Eýropanyń tanymal jýrnaly EurActiv uıymdastyrdy. Sharaǵa EP depýtattary, Eýropa komıssııasy jáne Eýropa syrtqy ister qyzmetiniń sheneýnikteri, dıplomatııalyq, parlamenttik korpýstardyń, úkimettik emes uıymdardyń ókilderi, jýrnalıster qatysty.
