Qazaqstannyń úsh óńirinde órt qaýpi joǵary- Qalmuhanbet Qasymov
ASTANA. QazAqparat - Aǵymdaǵy jyly elimizdiń batys, shyǵys jáne ońtústik óńirlerinde órt qaýpi joǵary bolmaq. Bul týraly búgin Úkimettiń selektorlyq rejımdegi otyrysynda QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Qazirgi tańda orman jáne dala órtteri keń etek alyp otyr, problemaǵa aınaldy. Jyl saıyn olardyń sany artýda. Mysaly 2016 jylmen salystyratyn bolsaq, ótken jyly elimizdiń orman qorynda 2 ese kóp órt tirkeldi. Órttengen aýmaq 5 esege artyp, materıaldyq shyǵyn 7 esege ósken bolatyn. Dala massıvindegi órt sany da artqany belgili. Olardyń jalpy aýmaǵy 850 myń gektarǵa jetip otyr. Bıylǵy jyly da órt qaýpi joǵary», - dedi mınıstr.
Onyń dereginshe, jyl basynan bastap kóktem ýaqytynda 45 orman jáne 4 dala órti tirkeldi. Órtengen jerdiń jalpy aýmaǵy 10 myń gektardan asady. Al materıaldyq zalal - 4,4 mln teńge.
«Aldaǵy órt qaýpi kezeńinde boljam boıynsha, ortasha temperatýra + 30 gradýsqa kóteriledi. Al elimizdiń ońtústik, shyǵys jáne batys bóliginde jer qurǵap, jaýyn-shashyn az túsip, aýa temperatýrasy +41 gradýsqa deıin kóteriledi degen boljam bar. Bul árıne, orman jáne dala órtteriniń artýyna túrki bolady. Jergilikti jerlerden kelgen málimetter boıynsha, barlyq óńir orman jáne dala órtterin aldyn alý sharalaryn bastap ketken. Qazirgi tańda biz vedomstvoaralyq jospardy iske asyryp jatyrmyz. Bul jospar ortalyq jáne jergilikti atqarýshy organdarmen kelisilgen»,- dedi ol.
Mınıstrdiń dereginshe, orman jáne dala órtterine qarsy óńirlik kúshter men quraldar anyqtalǵan. Olardyń qatarynda shamamen 30 myń adam jáne 4977 avtotsesterna, sý quıýǵa arnalǵan 17 tikushaq, 47 órt sóndirý poıyzy, 580 órt sóndirý matopompa syndy 6 myń tehnıka bar.
«Órtke qarsy qyzmet mamandary sharýa qojalyqtaryn tekserýdi qolǵa aldy. Qazirgi tańda olardyń basshylary men jumysshylaryna nusqaýlyq júrgizilip jatyr. Bastapqy órt sóndirý quraldarynyń bar-joǵy tekserilip, arnaıy jadynama taratylýda. Mamyr aıynyń sońyna deıin Tótenshe jaǵdaılar komıtetiniń órt sóndirý ınspektsııasy Aýyl sharýashylyǵy mınıstrligi men ákimdikterge qaraıtyn ulttyq parkterdi, tabıǵı qoryqtardy tekserýdi aıaqtaıtyn bolady. Balalar lagerlerin tekserý de erekshe nazar aýdaryp otyrmyz. Orman-dala alqaptary men demalys oryndaryn kúnsaıyn sholǵyndaý qolǵa alynǵan», - dedi Qasymov.
