Qazaqstannyń úsh oblysynda para alǵan sheneýnikter ustaldy
ASTANA. QazAqparat - Sybaılas jemqorlyqqa qarsy qyzmet ókilderi Qaraǵandy, Jambyl jáne Ońtústik Qazaqstan oblystarynyń laýazymdy tulǵalaryn para alý ústinde ustady, dep habarlaıdy «QazAqparat» HAA tilshisi Sybaılas jemqorlyqqa qarsy is-qımyl Ulttyq bıýrosynyń baspasóz qyzmetine silteme jasap.
«Ulttyq bıýronyń Qaraǵandy oblysy boıynsha departamenti oblystyq eńbek, áleýmettik damý jáne kóshi-qon departamenti №3 áleýmettik-medıtsınalyq sarapshylyq bóliminiń jetekshisi Ospanov M. 300 000 teńge kóleminde udaıy para alyp kelgenin áshkereledi», - delingen habarlamada.
2017 jyly 2 naýryzda Ospanov 3 toptaǵy múgedektik merzimin esh kedergisiz uzartý úshin berilgen 800 000 teńge kóleminde kezekti parasyn alý ústinde ustaldy jáne Jezqazǵan ІІB ýaqytsha ustaý oqshaýlaǵyshyna qamaldy.
Jambyl oblysynda Qordaı aýdany ákimdigi jer qatynastary bóliminiń basshysy Sazanbaı B. 300 000 teńge para alǵany úshin ustaldy. Zańsyz syıaqyny ol jerge ornalastyrý jobasyna qol qoıý úshin alǵan.
Dál osyndaı sebeppen, jer telimin bergeni úshin OQO Leńgir qalasynyń ákimi Baıymbetov S. jáne aýdandyq jer qatynastary bóliminiń bas mamany Turǵyn A. 100 00 teńge para alý ústinde ustaldy. Olar óz aıyptaryn tolyq moıyndady, sol sebepti sotqa deıingi is júrgizý jedeldetilgen túrde júrgiziledi.
